E ui ile puupuu ole taimi na maua ai le tusi mai Samoa e logo mai ai tamafanau ole afioaga o Fusi i Anoamaa oloo alaala i Aukilani mo se fesoasoani tau seleni auā le faaleleia ole tino ole malumalu oloo taupuai ai le Ekalesia EFKS i Fusi i Samoa, ae sa lē teena pe talitualimaina le valaau mai ale matagaluega mai Samoa.
E taunuu mai le tusi i nisi o tamalii o lea Ekalesia oloo i Aukilani, e lē o iai se mafutaga tuufaatasi i alo ma tamafanau ole EFKS a Fusi, ae ile taunuu mai ole tusi ma le faatalauula mai ole EFKS i Samoa mo se fesoasoani, o lea na taumafai ai loa nisi o tamalii faapea nisi o tina ma o latou alo e tuufaatasi ma faamaopoopo se mafutaga iinei i Aukilani e saili ai se seleni e tali ai le valaau mai ale matagaluega i Samoa.
Ole lua vaiaso na taunuu mai ai le tusi ma taumafai ai loa nai aiga e toafā ole afioaga o Fusi e fai se sailiga seleni auā le faamoemoe i Samoa. Ole Aso Toonai ua mavae, 26 o Novema na faataunuuina ai loa le sailiga seleni a lenei mafutaga tau amata ile fale faafiafia ole Parataiso i Otara. E maeu le lelei ole Alii i lea aso ile faamoemoe, auā e leai se manatu poo se lagona o nei aiga ole tali atu lea a nisi o aiga ole afioaga uo ma ē masani ile lagolagoina ole Posiva.
Na tatala faafiafiaga ile saasaaga ase tasi o tina matua ole mafutaga le tina ia Savea Tutogi Too ma faasolo ai loa ipu a nisi o aiga ole afioaga o Fusi Safata lea ua faamalo‘ulo‘u atu e fai so latou sao auā le faamoemoe ole EFKS i Samoa. Ole tofa ia Fa‘ifa‘i Siuleo sa fai ma fofoga ole aso, ae ole fetalaiga ia Tamala Gafa poo le susuga ia Mataitulivasa na ia taualugaina le faamoemoe.
E $14,000.00 le aao mafola o aiga ole afioaga faapea uo ma ē masani sa tauaaoina i lea aso, ma ole agaga faafetai ile tofa ia Fa‘ifa‘i ma nisi o tamalii ole afioaga oloo taulamua i lenei faamoemoe, ole seleni ua maua ile tali mai o aiga ma uo, ona e leai se manatu ose fuainumera lea e mafai ona ausia e lenei mafutaga tau amata.
Ma ua a‘e ai foi se tofa ma se lagona i nei aiga, ua alagatatau loa ona faavae ma faamautu loa se mafutaga ale afioaga o Fusi Anoamaa iinei i Aukilani auā nisi faamoemoe ole nuu. Auā e tusa lava pe motu mai ma le taula i aiga ma nuu sa tupuga a‘e ai, ae lē mafai ona tuua le agaga ole alofa ma le lotonuu pe a manaomia mai se fesoasoani mai aiga ma ekalesia, ma e iloa moni ai foi le Isaraelu moni e susue lona faamalama ma toe vaavaai i lona tupuaga ma lona faasinomaga.
