O feofoofoaiga ma feiloaiga i loimata o le fiafia, sa iai le Aso Toonai ua mavae i le Ekalesia Living Water Worship Centre i Henderson, ina ua faaulufale lo latou malumalu fou e pei ona tatalaina.
O susuga i faafeagaiga ma o latou faletua mai lala o le Ekalesia Worship Centre i Aukilani, o susuga i faafeagaiga mai isi ekalesia eseese sa auai faapea foi aiga lotu, o uo ma ē masani sa faatasi uma atu i lenei faamoemoe. Sa faapea foi ona mafuta mai ai ma le taitai aoao o le Ekalesia i Samoa le susuga i le Aposetolo ia Viliamu Mafoe ma lona faletua ia Lavina Mafoe.
O le faaulufaleina o le malumalu na saunoa faafetai ai le susuga i le faafeagaiga ia Aukuso Falaniko i le Atua, ona o lenei faamoemoe ua faataunuuina ma le fiafia, ma tatalo amata ai loa le susuga i le faafeagaiga ia Leuli Ieriko, o ia o le taitaifono o Ekalesia Worship Centre i Niu Sila. O le faletua ia Lavina Mafoe na ootiina le lipine, ma o le saunoaga a le tina o le galuega, o le Atua na faavaeina le galuega, e toe faafoi ia te ia lona viiga. Na tuu aloaia atu le ki o le fale e le alii Saina sa nafa ma le fausiaina o le malumalu, i le susuga ia Purge Young, ma tatala ai loa faitotoa o le malumalu e le susuga ia Pastor Aukuso Falaniko.
Na ulufale susuga i faafeagaiga ma o latou faletua ma le mamalu o le auvalaaulia, ma amatalia loa le sauniga. Sa molimauina le faatumulia o le malumalu i le atunuu na patipatia faatasi lea aso fiafia, ma o le susuga ia Ene Suani na faafeiloaia le atunuu, a o Fiteli Lemana na ia taitaiina le viiga.
O loto ua fatumulia i le fiafia na vaaia ai loimata i le taimi o le sauniga ona o le lelei o le Atua. O le aufaipese a le Ekalesia Worship Centre i Henderson na latou lagiina viiga o le sauniga, a o le susuga i le Aposetolo ia Viliamu Mafoe na ia folafolaina le afioga Paia a le Atua.
E leai se vaipanoa na lē mataalia ai le aufaigaluega i lea aso, e lē gata ia i latou sa vaaia le pakaina o taavale, ae o nisi foi sa faasinosinoina nofoa ma faafeiloaia le auvalaaulia na ulufale i totonu o le falesa. E galulue faatasi uma lava tamā, tina ma fanau.
Na mae‘a le sauniga ona agai lea i le taumafataga na faia i le hall a CIVIC i Henderson, ma o le faleaiga a le Talimanao na latou tapenaina lea faamoemoe.
O le susuga ia Tupai Lesa sa fai ma fofoga o le aso a o Fitelei Lemana sa tu tootoo e fai ma sui o le Ekalesia e faaleoina se upu faafetai i le mamalu o le auvalaaulia faapea susuga i faafeagaiga sa auai, ma na ia tauaaoina ai foi ma ni faaaloaloga e tali masineia ai le faaulufaleina o le malumalu fou o le Ekalesia.
O le toe fausiaina o lenei galuega e 1 le tausaga ma le 6 masina. O sailiga tupe lava sa nafa ma le Ekalesia na maua ai le seleni ma faataunuuina ai le faamoemoe. O sefuluai, o taulaga i le loto malie, faatauina o le fualaau‘aina, fufuluina o taavale (carwash) flea maketi a le lotu, faleaiga, ma i latou sa agalelei ma foai i lenei galuega.
E 45 matafale sa iai i lea sailiga tupe, ua iai foi la nisi o nei aiga lotu ua lē o toe galulue ai i totonu o le Ekalesia, ona ua agai nisi i Ausetalia o nisi foi ua galulue i nisi o tovine. E $490.000 le tupe sa faaaluina i lenei galuega, ae o loo iai le aitalafu o loo totoe.
O nei tupe sa tagi lava i lima lona sailiga e tamafanau o le lotu. O le taimi nei ua see atu le toatele o matafale i le 50 faatasi ai ma le susuga i le faafeagaiga ia Aukuso Falaniko ma lona faletua ia May Falaniko.
