E tolu aulotu sa faaulufale mai i totonu ma ua i lalo o le faamalu tele a le Ekalesia AOG Church of Samoa QLD lea o loo faauluulu i le Susuga i le taitai ia Ps Taeauga Ropati & faletua ia Sāeseese Frost. Na atofaina e faia lea sauniga tāua i le Aso Sa, aso 13 o Iulai.
O le ekalesia o nei ekalesia e tolu e aofia ai le aulotu a Forest Lake lea o loo tausia e le susuga ia Ps Iose ma le faletua ia Motina Lalau, Ekalesia lona lua o Ps Moatuli & faletua ia Lily ma le aulotu a Riverview ma le ekalesia lona tolu o Ps Fuimaono Malae & faletua ia Moli mai le aulotu i Dinmore.
O le mae‘a ai o le sauniga lotu ma talia aloaiaina ai loa aulotu ma suia ai loa le fuainumera o le Matagaluega a Kuiniselani i le fale 10. Sa maualuga le aso auā na auai mai foi le komiti faafoe aoao a Ausetalia i le Ekalesia AOG Church of Samoa mai Sini ma Melepone.
Sa valaaulia faapitoa le susuga i le toeaina o le Ekalesia LMS Toefuataina mai Melepone le susuga ia Rev Faiumu Pio Faletuai. E le gata i lea na auai mai foi tamaitai e toafā o le a tauva mo le pale o le Miss Samoa Australia i lenei tausaga, faapea le Miss Samoa Australia 2013-14.
O le tofa ia Taefu sa fai ma sui o le komiti a le Miss Samoa e faafeataia ma faaleo se mealofa mai le Ekalesia AOG ina ua mae‘a foi ona tauaaoina faaaloaloga mo le komiti a le Miss Samoa.
Sa taitaia lava le sauniga e le susuga i le taitai ia Ps Taeauga Ropati Frost faatasi ma sui o le komiti sa fai sao i lea sauniga tāua i le aoauli o le Aso Sa ua tuanai.
O le kapeteniina o le aso, o le tofa ia Fata Paulo Ioane mai Matatufu i Lotofaga. Na lagona le agaga fiafia o tagata uma i le lava tapena o le taumafataga ma faaaloaloga aemaise o papa-a-malo sa vaaia i lea aso.
Na ta‘ape le fuamanusina a o lei mae‘a le lauga faafetai ona e toe tuumuli le komiti aoao i Sini ma Melepone i le afiafi lava lea.