Asosi a SMOGA i Kuiniselani ile latou Ball ile po ole Aso Toonai ua tuanai

Asosi a SMOGA i Kuiniselani ile latou Ball ile po ole Aso Toonai ua tuanai

Na atofaina le po ole Aso Toonai aso 9 o Iuni e faataunuuina ai le faamoemoe o tamaitai o le Asosi a St Marys (SMOGA) i Kuinisleani e pei ona masani ai i le vaitaimi lenei i tausaga uma pe a mae’a le faamanatuina o le sisigafu’a i tausaga taitasi. O se po uiga ese le aulelei ma manaia ile faatumulia ile auvalaaulia, aemaise le felanulanua’i o teuga a tagata.

O le lagolago a le atunuu, ua avea lea ma faamalosi’au i le Asosi e ala i a latou sailiga seleni aua le faatupeina o a latou sikolasipi i le a’oga na fofoa a’e ai o latou soifua faalea’oa’oga (St Marys i Samoa).

Na muai sii foi mea i matautusa e ala ile taulaga siitia e lana auauna, le afioga ia Patele Epati Tamati Aiolupotea ona faagasolo foi lea o polokalame masani ole po. O le manatu maualuga o nei faletua ma tamaitai o faamaopoopoina lenei Asosi i Kuiniselani ia malolosi loto e tali atu ai le manaomia mai Samoa e ala i lo latou agalelei atu ma faatupe a’oga a nisi o alo ma fanau, e afua ai lenei faamoemoe i tausaga uma.

Tamaitai Sa, Afioga Patele Epati Tamati &Taulapapa Lemalu Roy Slade

Tamaitai Sa, Afioga Patele Epati Tamati &Taulapapa Lemalu Roy Slade

E toatele nisi o faletua ma tamaitai ua faasolo ina matutua soifua, ae le mavae lava le fia fesoasoani ma le lagolago aua ole tele o lima e māmā ai se ‘avega. Na auai le Peresetene o le mafutaga Tuufaatasi a Samoa i Kuiniselani ma le faletua, aua o se tasi o tamaitai tuai ole a’oga le faletua ia Joyita Stanley Slade ma nisi o faletua sa mautofi e pei ole faletua ia Agnes Felix sa avea foi ma peresetene ole SMOGA a Kuiniselani. Na auai sui o tama tuai o Sanele, tama tuai ole Malisi faapea sui o le asosi a Pope Paulo le VI aemaise le toatele o nisi sa opogi le faamoemoe a le SMOGA.

Na fiafia tagata uma aua e le gata o se feiloaiga faaleuo, faaleuso ae sili ai le faamalieina o finagalo ise ripoti a le SMOGA ia latou galuega fai o lea tausaga ma lea tausaga e ala i a latou fesoasoani o tuuina atu pea ile a’oga a St Marys i Samoa.

O le laulau ale SMOGA a Kuiniselani i lenei paea’iga e aofia ai  le: Peresetene Pearl Tupua. Teuoloa Joyita Toalepaialii, Failautusi Jazz Ah Kiau. Nisi o sui auai:  Moana Nimo, Leticia Lam, Lidwina Ah Dar, Eseta Tupuola ma Rachel Laloata.

Peresetene a le Asosi a Paul VI, sui o Sanele ma nisi sa auai ile Ball a SMOGA

Peresetene a le Asosi a Paul VI, sui o Sanele ma nisi sa auai ile Ball a SMOGA