Ua gūgū lava le Toomaga mo ē Puapuagatia i le faatonuga na maua i le vaiaso na tea nei e tapena ese ai mai i le fogafale a luga o le latou ofisa tutotonu ae faaavanoa lea nofoaga mo le matagaluega o Leoleo.
O se faaiuga na faateia ai le Faalapotopotoga ae ona pau le tali na aumai e usitaia le faaiuga ua avatu ae o le a tau faasoasoa foi le fogafale a lalo o lea nofoaga ona ua tumu i le taimi lenei.
O le masina o Mati o le tausaga lenei i le faamanatu ai o le atoaga o le 10 tausaga talu ona faavae le Toomaga mo ē Puapuagatia i Samoa, na tatala aloaia ai loa le fogafale lua lea e i autafa o le Ofisa fou o Leoleo mo le nofoaga tutotonu o le Toomaga mo ē Puapuagatia i Apia. O se fale na faaaogā i tausaga ua mavae mo toleniga a leoleo lea na faia i le pito i luga atoa ai ma le ofisa o leoleo e patino i tagi e ave i luma o le faamasinoga. O le fogafale a lalo na iai potu na taofia ai tagata e avatu i solitulafono a o lei agai i le toese i Tafaigata.
O lea la ua sui atoa ina ua toe fausia e le Toomaga mo ē Puapuagatia lea nofoaga. Na ta‘ua e le alii Palemia i le tatalaga o lenei fale, sa iai lava le fuafuaga e tala i lalo ona o le fale lea o le vaitau o pulega a Siamani ma ua faaletonu, ua pala ae o le agai atu o le Toomaga mo ē Puapuagatia i le Malo mo se nofoaga tutotonu lea na toe tatala ai loa le avanoa e agai le Faalapotopotoga lenei e saili se auala e mafai ai ona tumau foliga o lenei fale tāua i le talafaasolopito o Samoa ae ia toe faalelei atoa.
O le tausaga atoa na feagai ai le Toomaga ma galuega toe faaleleia ma tatala ai loa i le masina o Mati. E ui o lea ua avatu se tusi i le Alii Palemia ina ia tapena ese ai le ofisa o le Toomaga i le fogafale i lalo ona o le manatu e tatau ona ave pea le pito i luga o le maota i le ofisa o leoleo. O se faaiuga na ta‘ua e le alii Palemia ina ua tapa sona finagalo ua leva lava ona fai a o lei tatalaina le maota fou lenei.
“Sa matou feiloai ma le minisita o Leoleo, ia Sala Fata faapea le minisita o loo avea ma faatamā o le Toomaga mo ē Puapuagatia, ia Tuisugaletaua Sofara Aveau,” o se faamatalaga lea a le alii Palemia. “O fuafuaga lava ia sa iai e faaavanoa le pito i luga mo le ofisa o leoleo”.
O le taimi lenei o le pito i luga o le ofisa lea o loo iai le potu fono o le Toomaga mo ē Puapuagatia lea e faaaogā i fonotaga ma aoaoga a le Faalapotopotoga ma o loo iai ma nisi o ofisa o le pulega o le ofisa, ae o le pito i lalo ua iai ofisa mo le agai atu ai o le toatele e faato‘ai atu a latou mataupu ma maua ai le avanoa e faatalatalanoa ai a latou tagi poo faafitauli foi, ma o loo iai ma le nofoaga lea e fesootai atu ai le atunuu mo fautuaga i luga o le telefoni, le Laina o le Ola e pei ona ta‘ua ai.
O lea la ua amata ona agai ane i lalo sui o le Toomaga mo ē Puapuagatia ma ua taumafai foi ina ia toe faaofiofi i le vaega lea o le maota na manatu o le a faaaogā uma e le Faalapotopotoga.
