E faagasolo se aoaoga a tusitala o Samoa faatatau i le galuega suesue ma le sailiili o lipoti ae agai atu se tamaitai, o se sui o tupulaga talavou a Samoa i le fono a tupulaga talavou o le Pasefika na usuia i Apia i le vaiaso ua tea.
O lea tamaitai o Afioga le suafa na agai atu i ni tusitala e masani ai mo se fesoasoani ona o le ita tele. Faaalia e lenei tamaitai i tusitala ia Lagi Keresoma ma Leilua Ame Sene, ua fia faalauiloa se faiga ua ia vaaia i le fono tele lea ua agai atu ia te ia ae e lē iloa pe aisea.
O Afioga poo Fiona e pei ona silafia ai lenei tamaitai, o le sui lea e toatasi o Upolu na filiifilia e avea ma sui o Samoa i lenei fono a tupulaga talavou. E toafā isi na filifili faatasi mo le toalima mai i Samoa nei. O le isi toafā e mai i le motu tele i Salafai.
O lea tamaitai e fai sana pisinisi e faatau ai chips e gaosi i le fa‘i. O tupulaga uma na filifilia e le Vaega o le Tupulaga talavou a le Matagaluega o Mataupu tau Tamaitai, Atina‘e o Nuu ma Aga Fesootai.
O le fono lenei ua tuufaatasia ai tupulaga o le Pasefika ma o le Ofisa o Atinae a Malo Aufaatasi na faatupea lenei faamoemoe ua aumai ai i Samoa isi tupulaga talavou.
Faaalia e lenei tamaitai o le aso lava na agai atu ai e lesitala i le amataga o le vaiaso, na lē lelei lava uiga o tamaitai Samoa o loo i le ofisa o Malo Aufaatasi ia te ia, ma o faamatalaga ua faalauiloa ane e lē o lesitala aloaia lea tamaitai ona sa avatu e “faatumu ai se avanoa ua lē mafai ona agai atu ai se isi talavou”. E ui i ia faamatalaga na agai lava lenei tamaitai ma fono ai i le vaiaso atoa o lenei faamoemoe.
O le tau faaiuiuga o le fonotaga na tufa ai tusipasi ma faapea ona tufa alauni, o tupe e maua e sui usufono ae oo atu le faasologa ia te ia ae avatu le faamatalaga ona e lē o se sui lesitala sa‘o o lea e lē maua ai se tusipasi ma se alauni.
O se faaiuga na ta‘ua e Fiona i tusitala nei, ua matuā lagona ai loa ma lona ita. Na agai tusitala nei e toalua i le ofisa o Malo Aufaatasi ma faatalatalanoa loa tamaitai, o le Samoa le isi ae o le Asia le isi e galulue i le ofisa lea i Matautu.
Ta‘ua e tusitala na ta‘u atu loa le igoa o Afioga poo Fiona alu atu loa ma le lipoti ua ta‘ua ai lenei tamaitai o le faatupu vevesi (trouble maker) i totonu o le fono. E taumafai lava e faatonu tupulaga talavou na auai.
Sa onā ma moe i luga o le matafaga na agai ai se tafaoga mo tupulaga uma o le Pasefika, ma na nofo ma togi i lalo lana bbq na ave i ai i lea tafaoga. Na faaopoopo ane ma tala na laga muamua e Afioga o le tulaga lea e lē o se sui na lesitala aloaia mo lea fonotaga ae ua na ona faatumu ai o avanoa ua lē oo atu nisi o tupulaga na fuafua i ai nei avanoa.
Sa teena uma e lenei tamaitai ia tuua‘iga o lona faatupu vevesi ina ua toe tapa e tusitala. Na toe agai tusitala e toalua ia Leilua ma Keresoma ma tapa se finagalo o le Matagaluega o Tina ma Tamaitai, Atina‘e o Nuu ma Aga Fesootai e faatatau i lea mataupu ma ta‘ua ai e le Ofisa Sili Lagolago a le Matagaluega o loo nafa ma le vaega lea o Tupulaga Talavou, o Afioga o le sui aloaia lava lea na faaofi atu e le Matagaluega i le ofisa lea o Malo Aufaatasi mo lea faatasiga i le vaiaso atoa, ma e lē iloa pe o fea e sau ai faamatalaga a tamaitai nei o le ofisa o Malo Aufaatasi e faatatau i le sui na aloaia lava le avatu e le Matagaluega.
Ona pau le faamatalaga a tusitala nei na tuu loa le faatalatalanoaga ae na maua se feiloaiga na toe fai e tamaitai nei ma sui o le Matagaluega o Tina ma Tamaitai ma na faatoese ai nei tamaitai i le talavou lea na laga le mataupu ma le faiga faapea o ia.
Na toe ave i ai lona tusipasi ma lana alauni ma ua faasoa foi i tusitala o le fonotaga a tusitala lea na faagasolo ai lenei mataupu mo le faalauiloa atili.
