“A faatumulia le agaga, ona feto‘i lea ole laulau”, oni lagona ia o molimau, ona o foliga talimalo lelei ole susuga ile faafeagaiga Rob Lotomau male faletua ia Fou, aemaise le Ekalesia My Father’s House, faapea male lagolago a ekalesia ‘Tasi ia Keriso’ i Brisbane, sa gafataulimaina le mafutaga a Faifeau ma taitai o Faalapotopotoga Kerisiano eseese, ile Koneferenisi ale Samoan Pastors and Leaders International Network – SPLIN 2016.
Ose taimi muamua lea ua talimalo ai Brisbane ile koneferenisi ale SPLIN, e pei ona faataunuuina ile malumalu ale Albany Christian Church Warner ile aso 5-9 o Setema ole vaiaso na tea nei, lea e taitaifono ai le susuga ile faafeagaiga, Pastor Iliafi Esera male faletua ia Falefiaoalii Esera.
Ose vaiaso o faamanuiaga, ole toe feiloai male mafuta mafanafana ole aufaigaluega Kerisiano, e toe faamauaa ai, faamalosia agaga male toe faalototeleina auauna ale Atua ma taitai o ekalesia eseese e ala ile fefaasoaai male folafolaina ole afioga ale Atua. Ole aufaigaluega mai ekalesia eseese mai Amerika, Amerika Samoa, Hawaii, Samoa, Niu Sila ma Ausetalia.
E tele nisi o susuga i faafeagaiga, faletua ma nofoaalo mai Brisbane ole uluai taimi lea faatoa auai ai. Ile lipoti sa fofogaina ile po mulimuli ole mafutaga ele susuga ile failautusi Ps Chris Sola, e 155 tagata lesitala ae silia male 250 le fuainumera o latou na auai i taimi o sauniga ole koneferenisi.
Ose tasi o vaega tāua sa faagasolo ole mafutaga, ole taamilosaga tapolo a faifeau, ole tausaga nei, ua manumalo ai le susuga faafeagaiga Peria Faaumu (Brisbane) ile taamilosaga a alii, ae ole faletua ia Vaonila Leota (Aukilani) ua manumalo ile taamilosaga a tamaitai.
Ole ‘Tasi ia Keriso’, ose mafutaga tuufaatasi a aufaigaluega Samoa i totonu o Brisbane, sa fesoasoani ile koneferenisi, e pei ona auai susuga i faafeagaiga ma faletua mai le Hosanna Brisbane Network, o Ps Asafo & Helen Avia, Ps Manuia & Ruta Aloalii, ma Ps Frank & Neetia Moli.
E pei ona masani ai i tausaga taitasi, ole vaiaso e sosoo ina ua mae‘a le Aso Sa o Tamā, e faataunuuina ai le koneferenisi, ma ole tausaga 2017 ua tulimatai pe a aulia ile pule alofa ale Atua, ole a tapenaina ma talimalo ai le susuga ile faafeagaiga Ps Samoa & Alesi Unoi, aemaise le ekalesia Peace Chapel i Vaimoso i Apia.
Ole susuga Rev Rolani Mika mai le ekalesia Faapotopotoga Kerisiano a Iesu i Aukilani, sa avea ma fofoga molimoli ole susuga ile taitaifono male komiti faafoe, sa fesiligia ele Samoa Times mo nai otootoga o sana molimau i lona auai ile mafutaga.
“Sa vaaia le faatumulia ole aufaigaluega i loto faagaeetia, ona ole tautua male auaunaga, o faiva o pule ma faiva o faaaloalo, e afua mai ile segisegi ole aso fou, seia oo lava ile tuneva ole pogisa, e leai, leai lava se faalogologotiga.
“E mulia‘i oo mai gasesega o taumafa ma meainu, ae ua laulelei lava i o latou foliga fiafia male ataata, ole tausaafia male tauagafau, e faatutugata ai le Mafutaga e fia vave foi mo ni malologa, ae ua taalao e faasoa lagona lelei male fia mafuta pea. Ua taunuu ai le upu, ‘Ua pele i upu, pele i ai, pele i aga, pele foi i foliga’.”
“Ole itu faaleagaga ole mafutaga, ole vaega sili lea ona ave iai le faamuamua ma faatāuaina, aua, ua faamalosia, ua faaloatoteleina, ua faamafanafanaina, ma ua saga faatupuina le faatuatua ole Au-Folafola ole Talalelei mai Fatafaitaulaga e fia, o i latou uma sa mafai ona faamaloulou mai i tafa e fia ole lalolagi, oloo faatunapa‘ulia ai, auā le Atua ma Lana Ekalesia”.
“E moni lava le mau, e faaola totoga mea sa olioli ma fiafia iai, e pei ole mafutaga mafana male mafutaga manaia.”
“Ua lē oni toga, poo ni taumafa, oni mamalu ma ni pāpā ua faaee atu, e pei ona masani ai fesilafaiga a itu tetele ma itu taulagi ole atunuu, ae ua toe utupupuina le malosi galue, le soifua ma‘ema‘e mole Atua ma Lona Malo, le galulue faatasi, le toe lalagaina ole fia sosofaina pea o vasa ma atumauga mole Talalelei ale Malo ole Atua, ole ola faimealelei, aemaise ole lē faalogologotiga ile auaunaga”.
“O i latou sa vaivai, ua faamalosia, o ē sa faavaatu‘ia ua toe faaosofia le loto male agaga, ua pei ua sausau fialele le manu nai utufiu, ma naunau e toe fia oo atu ile tailoloto ole auaunaga male tautua ile Ekalesia, auā tatou te lē tumalo ai pea, e iai lava taimi e vaivai ai.
E faamaai ele uamea le uamea. O tiga ma faafatiatama‘i ole Galuega, e leai a se isi e sili ona toomaga iai, ua na ole Alii lava o Iesu Keriso. E leitioa a fai mai le Upu, “E naunau le mutia ile sau.” Aisea? Auā foi e faaola totoga le sau ile mutia. Ole lagona lena sa puea loto ma agaga o i latou uma sa mafai ona oo atu i lenei Mafutaga matagofie, suamalie male aulelei”.
“O alofaaga mo le auuso i Brisbane sa galulue ile tausiga o lenei Mafutaga, Ia alofagia ele Alii lo outou aao ulufia male afusisina, aua
ne‘i mate le magalafu, ia ola pea le afi, ma ia tumu pea le tuluga, e lē galo Afi‘a isi ona vao”.
“Faapea foi alofaaga mole Aufaigaluega
Folafola sa momolia le Finagalo Paia ole Alii, aemaise foi o alo ma fanau mai le Pastors Kids(PK). E lē auaoa le lagi i Lana silasila i lo outou soifua saili. Le fanau, ia tatalaina pea ele Alii o outou loto tou te lagonaina ai Lona Siufofoga i lo outou faaaogaina mo Lona Finagalo i aso nei ma le lumanai”.
Ina ua mae‘a le koneferenisi, sa fesiligia ele Samoa Times le susuga ile taitaifono ia Iliafi i sana saunoaga mo lenei lipoti, o lona finagalo e faapea: “Ia alofagia ele Atua le folauga o lona nuu ma lana aufaigaluega ile toega o lenei tausaga.
Ia soifua saogalemu Samoa, le Ekalesia ale Atua Soifua ma Lana Aufaigaluaega totofi ile pule tonu ale Alii o Iesu Keriso le Ao ole Ekalesia, male Tupu ole Atunuu”.
