Ua amatalia nei le polokalame a le autalavou e fefiloi ai le faaperetania ma le faasamoa i luga o le alaleo a le Switch lea o loo tautua ai le Penina o Asuisui.
O nei avanoa e faaosofia ai ma faamalosia ai alo ma fanau ina ia faatāuaina pea tulaga tau aoaoga. E lē gata o tamaiti ae faapea foi ia i latou uma e fia faalauteleina le malamalama ae faapitoa lava ona unaia ai alo ma fanau.
Ua ofi mai le tofa ia Tagoiaega Bruce Manu-Sione (aoaoina i lona faailoga tikeri Bachelor of Education majoring in Secondary English i USQ Springfield, galue nei i Glenala SHS o se Maori & Pasifika Officer/Senior behaviour Case Manager) faapea le susuga i le alii Toga o Lisiate (Richard) Niu o loo aoaoina foi i lona faailoga Bachelor of Education majoring in Secondary English i le UQ, ma o loo galue foi i Glenala SHS o se Teacher Aide/Maori & Pasifika support officer.
O se faamanuiaga ma se faamalosiau i alo ma fanau ina ia faataunuu a latou miti e aua le fiu gofie ae faamalolosi auā e ui ina faigata le sailiina o le atamai ae peitai e tua lelei i le lumanai.
Ua amataina la laua polokalame i taeao o Aso Toonai taitasi ma ua fuafua e faaopoopo nisi aso o le la polokalame auā e aogā mo soo se tasi ae sili lava alo ma fanau ma le tupulaga talavou.
E lē gata o Glenala i le itu o Sisifo o Brisbane ae ua tele foi alo ma fanau Pasefika i nisi aoga ua alualu i luma lo latou tulaga lelei i vasega taitasi aemaise pe a faauu mai le Year 12.
O nisi o loo vaaia pea le lē muta o le taumafai ae o loo toatele i latou o loo agai atu i Iuniveste ma faaauau ai aoaoga i se lumanai manuia o aiga, nuu, ekalesia ma atunuu.
E mitamita foi le loto i alo ma fanau a Samoa ma le Pasefika o loo avea ma ave fu‘a e ala i galuega i totonu o le tele o aoaoga a Kuiniselani.
O se luitau foi lea i alo ma fanau o loo tutupu a‘e ina ia faataunuu pea a latou miti. E momoli le agaga faafetai a le Pulega o le Penina o Asuisui e lē gata o nisi matagaluega a le malo ae faapea foi le polokalame mo aoaoga lea ua faatautaia e le tofa ia Tagoiaega Bruce Manu-Sione ma le susuga ia Lisate Richard Niu.
O la laua silasila mamao
· Education – A journey to a world of possibilities for our Maori & Pasifika People
· Education – The power it has to change and create promising futures for our people.
Faafofoga i lea polokalame i le numera o le 1197am i luga o le Switch i le polokalame a le Penina o Asuisui. Mo nisi faamatalaga valaau le (07) 3067 7097) i taeao o Aso Toonai mai le 9-10am.
