E lei faatamala tina i le tapenaga mo le faamatagofieina o tamā i lo latou Aso Sa faapitoa, mai lava i laei, o le lauao aemaise o le faaulaina na faailoa mai ai foi o tua atu o le tama aulelei, o atagia mai ai le tina matuā lalelei ma le matagofie. O foliga ia i le Aso Sa i tamā uma o le aulotu a le susuga i le faafeagaiga, Susuga Salamasina Tim Toilolo, sau loa ma le lauga a le faifeau na faatāua ai le galuega faataitai a Iosua ma lona faaauauina o le tauaveina o le nuu o Isaraelu ina ua taunuu i le nuu na folafolaina mai e le Atua mo i latou o Kanana.
Tele ni feau tāua na faamalosiau ai le fofogaina mai o le upu a le Atua e faatāua ai tamā, aemaise o le faamanatuina ia manatua pea e tamā a latou matafaioi i totonu o aiga, nuu aemaise o Ekalesia.
Na matuā saunia lelei foi tamā ma faatinoina nisi vaega o le sauniga i ni a latou item faaleagaga na atili faamatagofieina ai le momoli maiga o le feau a le Atua na ala mai i lana auauna faifeau.
Sa taualuga lea sauniga faapitoa mo tamā i le toonai manaia ma le tamaoaiga na saunia lelei e le faletua ia Fepuleai Lagi Toilolo ma le paia ma le mamalu o le mafutaga a tina o le Ekalesia.
Sa faapena foi ona faamalieina le auvalaaulia na auai atu e molimauina le alofa o le Atua i tamā auā na lē gata i le matagofie o meaai faaleagaga i le faafofoga ma le maimoa, ae pa‘ū ane foi i le tausiga o le laualo, ua matuā ova lava ona o tapenaga mae‘ae‘a a tina.
