Ole tausaga e 2012 na uluai faatino ai e le Malo se sauniga e amanaia ai le tautua a tagata faigaluega uma ale Malo ma ose faamoemoe foi ua tauaao ai ma faailoga e faapine ai le tautua matavela o nisi o tagata faigaluega sinia ile itupa o alii ma tamaitai. E faapena foi lenei tausaga ua faatino ai lea sauniga sa auai Matagaluega uma ma Faalapotopotoga ale Malo.
Ose aso foi e faia ai faalauiloa o auaunaga eseese ale Malo ma afiffio ma susu atu le mamalu ole atunuu mo lo latou silafia. Ole taeao sesegi ole Aso Tofi ua mavae na tumutumu ai luma maota ole Malo ile eleele fou i Apia ile faitau selau ma selau o tagata faigaluega ale Malo ina ua taunuu iai le savali umi mai le nofoaga oloo iai le matagaluega ole fuimu.
Na saunoa ai le ta’ita’i ole Malo le afioga ile Palemia susuga Tuilaepa Lupesoliai Sailele Malielegaoi ile saunoaga autu ole aso :
“Ole auga o lenei aso, ole amanaia lea ole sao ma le tautua ale aufaigaluega ile mamalu ole atunuu aemaise le atinaeina ole Malo. E le faagaloina foi le tautua ma le sao o tamalii ua malolo litaea faapea i latou ua fai-i-lagi le folauga ma ua lago mau i tiasa.
Ole vaaiga taulai ale Malo i Fuafuaga mo Pulega ma Taiala o Auaunaga ale Malo 2013/14 – 2017/18, ole mafai lea e se aufaigaluega ua lava tapena ona tuuina atu le auaunaga silisili ile atunuu ise tulaga taugofie, faigofie ma atoatoa.
Ole aufaigaluega ale Malo ua iai le tomai ma le agavaa e faatino fuafuaga faaletulafono ma faiga faavae ina ia ausia ni taunuuga lelei auā se lumanai manuia mo lo tatou atunuu. Ole naunautaiga ole Malo, ole uunaia lea ole galulue soosoo tauau o ona itutino eseese uma, ina ia femalamalamaa’i fua i faamatalaga moomia e faafaigofie ai galuega faatino ina ia vave ona tali atu ai i manaoga ole atunuu.
Oute talitonu e le toe tau faailoina fuafuaga ma galuega ale Malo ua amata faatino atoa ma nisi o galuega tetele ma tāua ua fuafua lona faatinoina ile lumanai.
E aofia a i nei galuega fuafuaina le faaauau pea ona sailia o ni polokalame ma metotia fou e siitia ai le faatinoga o galuega, faapea le iloiloina ole faatulagaina o Matagaluega ma Ofisa ale Malo ina ia mafai ona faaitiitia a tatou vaegatupe faaalu.
Ose tasi o galuega tāua ua fuafuaina ole fausiaina lea ose faiga faavae e ta’ua ole ‘Clever Country Policy’ e uunaia ai le aufaigaluega ina ia siitia le tomai ma agavaa e faagaioi ai galuega a lo tatou Malo.
O nei taumafaiga uma e tasi lava le sini autu, ‘Ina ia atagia ai pulega manino ma ia mafai ona tali atu, ma ia malamalama lelei le aufaigaluega i lo latou sao ile atinaeina ole Malo ma Samoa i ona vaega eseese’.
Ole sini autū o lenei aso: ‘OLE AMANAIA LEA OLE SAO TĀUA MA LE TAUTUA ALE AUFAIGALUEGA ALE MALO O SAMOA”. Ose faamanatu tāua tele lea ile aufaigaluega oloo faatinoa le auaunaga ina ia fai ma le faamaoni, faatino ma le alofa ma ia galulue ma le faaeteete ona e faamasino Samoa aemaise le Silisiliese oloo sisila fofoga i la outou galuega fai.
Ia manatua lelei e outou ua avea ma tagata faigaluega a lo tatou Malo, o tofiga uma e mai ile Atua lea. E le fesiligia foi ni lape ma ni faaletonu o la outou auaunaga auā e iai lava faaosoosoga i taimi uma ile soifuaga nei. Ae peitai, ole valaauina ole tagata i soo se tofiga faalegaluega i galuega ale Malo, e tāua tele ona e moomia le faamaoni, naunau ma le faaeteete e faatino ai le auaunaga mo le mamalu ole atunuu.
Ma oute fia faaaogaina lenei avanoa tāua oute faapea atu ai i tagata faigaluega uma ale Malo, FAAMALO I LA OUTOU TAUTUA UA OFOINA ATU ILE MAMALU O SAMOA.
Ona faaiu atu ai lea o sa’u upu i lenei taeao e faapea; ‘UA TATALA ALOAIA NEI LE FAAILOGAINA OLE ASO FAAPITOA LONA LIMA MO TAGATA FAIGALUEGA UMA ALE MALO’. Faamanuia mai le Atua ile aofia ua potopoto aemaise le auvalaaulia, faamanuia le Atua i Faauluuluga o Matagaluega ma Ofisa uma ale Malo aemaise le aufaigaluega ua faasino iai lenei aso faapitoa”.
O suafa nei o tagata faigaluega ale Malo na amanaia a latou tautua ile faamoemoe o lenei tausaga:
Tauloa Auvae Lui – ACB Accident Compensation Corporation (40 tausaga)
Tauo Mulifusi Togafau – ACB Accident Compensation Corporation (32 tausaga)
Tunumafono Sinapi – SQA –
Tautala Tovala Sapa – Development Bank (39 tausaga)
Taealio Vaai – Teacher MESC (45 tausaga)
Fuatino Faatuuala – Teacher MESC (42 tausaga)
Luamanuvae Gaugau Mateo Ah Tong – Ministry of Health (34 tausaga)
Time Kolone – MNRE (42 tausaga)
Leiataua Aviga Salele – Retired (ACEO Police) (41 tausaga)
Fauono Talalelei Tapu – Retired (ACEO Police) (43 tausaga)
Fuatino Tofi – MPMC (45 tausaga)
Siavata Gale – NUS (50 tausaga)
Vipula Maiava – NUS Nursing (49 tausaga)
Metita Vaafusuaga – NUS Nursing (43 tausaga)
Ma Fulu Aiolupotea – NUS Nursing (43 tausaga)
Seiuli Vaifou Temese – NUS Samoan Studies (41 tausaga)
Naumati Vasa – NUS Samoan Studies (39 tausaga)
Silafau Dr. Sina Vaai – NUS Professor English (37 tausaga)
Tuatu Kalepo – Samoa Bureau of Statistics (34 tausaga)
Senara Noaese Te’o – STEC (Samoa Trust Estates) (42 tausaga)
