O le uluai aso o le polokalame a leoleo o le tuuina atu o fana o loo umia faasolitulafono e tagata o le atunuu e aunoa ma le faia o ni moliaga tau solitulafono, e 20 laau malosi na muamua lava tuuina atu. O nisi o ia aupega o loo faaaogā i taua i atunuu o loo tulai mai ai vevesi.
O le fesili pe faapefea ona ulufale mai i Samoa nei laau sili ona matautia. Na saunoa le afioga i le Palemia i lana polokalame ma tusitala i le vaiaso ua mavae, e tasi lava le faamoemoe e mafua ai ona faaulufale faananā mai ai laau malosi o le leoina o faiga solitulafono i toga maruana poo laau faasāina, ma o fana ia e tafana ai leoleo pe a oo ina agai atu osofaiga mo le faatama‘ia o laau faasāina.
I le tatalaina aloaia o le polokalame a le Matagaluega o leoleo na saunoa ai le sui Palemia le afioga Lautafi Fio Selafi Purcell ma ia faailoa e lē o lava le aufaigaluega i le ofisa o le tiute ma leoleo e leoina tuaoi o le atunuu, e ala i tagata malaga mai i vaalele ma oloa o loo aumaia e vaa tetele o le sami ma taunuu i le uafu tele o le atunuu i Matautu i Apia.
“O le taimi nei e tatau ai i le atunuu aemaise i latou o umia ni fana e lei laiseneina poo ni fana foi na faaulufale mai i ni auala e lē tusa ai ma le tulafono, ua tatau ona faafoi mai ae leai ni moliaga e faia ia te oe”.
Na faaalia foi e le Lautafi afai o iai ma ni pomu poo nisi lava ituaiga o mea faapapa malolosi o le taimi lenei e avatu ai. O le aso muamua o Novema 2015 na amata ai lenei polokalame ae ma’ea i le faai’uga o le masina fou o Tesema.
E lata lava i le selau aupega o laau malosi i ona ituaiga eseese na faatama‘ia uma i le uluai aso o le polokalame. O nisi o laau malosi na maua i osofaiga a leoleo i toga maruana ma isi ituaiga o pauta faasāina.
O le molimau a le toatele sa molimauina lea polokalame tāua, talosia ia avatu uma laau malosi a tagata o umia faasolitulafono ni aupega. O le tolu ai lea o polokalame faapea ua faia e leoleo, peitai o loo molimauina pea le faatupulaia o laau malosi e sa ona faaulufale i Samoa o loo maua i osofaiga a leoleo, faapea laau o loo aafia ai le soifua o nisi tagata i ni faalavelave ua faaoo ai e nisi le maliu ma le manu‘a.
O lona uiga e pei ona faaalia e le sui palemia o oloa o loo aumaia i le atunuu i pusaoloa tetele poo containers o loo mafai ona sao mai ai nisi o aupega.
