A mālie se pese, e mou ese lava ni ao pogisa o ni faanoanoaga ae fotua‘i mai lagona o le fiafia ma amata loa ona faasolo manatu i upu o lea pese. O aso o le olaga e iai taimi e ata ai ma tagi ai, e lutia foi i puava ae mapu lava i Fagalele e ala i nisi o pese e apoapoai mai ai le alofa o le Atua. O nisi ulugalii e toe faalelei lava se la misa i le mālū mai o ni upu o se pese auā foi na te momoli maia se feau tāua i le loto ma le agaga o se tagata loto mafatia. E momoli le agaga faafetai tele i le toatele o alo pepese o Samoa ma le faailoaina o a latou taleni pese.
Ua lē masino le logo mālie o a latou fatuga. O nisi nei o alo pepese o le atunuu o loo tālia atu e Kuiniselani aemaise lava le aueva ma le vaega lea e faatāuaina pea le tele o musika. Ua faamoemoe o le afiafi o le Aso Faraile aso 4 o Aperila o le a faafiafia ai le susuga ia Vaniah Toloa ma Zipso. O le tour lea a le “Sons of Samoa” e pei ona silafia, ma ua tele ina lauiloa lea koneseti e le toatele.
Ua faamoemoe o le a faafiafia i le Acacia Ridge Hotele i le aai o Acacia Ridge. O se tasi lenei o nofoaga e tele ina faia ai faafiafiaga a alii pepese o loo autovaa mai ma fai sao i lenei foi aai. E talitonu o le a toatele foi tupulaga ma le au matutua o le a auai i lea po e silasila toto‘a ia Vaniah Toloa. O le masina ua tuanai sa faafiafia ai foi le Nanai brothers faapea Zipso i le nofoaaga lava lea o Acacia Ridge.
O loo faalauiloaina le koniseti a le Sons of Samoa e le Loud Events, The Tagilaos ma le Allstar Events. E $25 tala o loo faatau ai i le taimi nei le pepa ulufale i lea faafiafiaga, ae $35 tala pe a faatau i le faitotoa i le po o le faafiafiaga. O loo lagolagoina malosi foi e le faaili a le One sound. E mafai ona valaau Len i le telefoni 0415 414 245 mo nisi faamatalaga i lenei faamoemoe.
