O timuga mamafa ma tafega faapea lologa ile atunuu ona o uiga louloua ole tau, tusa nei ma le vaiaso atoa ua mavae ma le amataga ole vaiaso na tea nei, na faataalise atu ai se lapataiga ale Matagaluega ole Soifua Maloloina ile atunuu ina ia faapuna le suavai a’o lei faaaogāina.
O lologa foi ma timuga ose taimi fiafia lea e tautuufua ai iniseti ole namu oloo mafua ai faama’i e pei ole fiva taifoi ma le dengue fever, ma o fautuaga masani ale soifua maloloina ole faamamā o nofoaga e tautuufua ai ia iniseti faalafua. Ole gasegase ole dengue fever poo le fiva o ponaivi ua lipotia le maliu ai ose tamā talavou ma ua faaalia ise lipoti o lea tamā e lei leva ona toe taliu mai Niu Sila ma lona aiga e faamautu i Samoa.
E 43 tausaga o Sooalo Fiaalii Mariner lea ua ta’ua ile lipoti e ono vaiaso talu ona taunuu i Samoa ae afea loa ele gasegase ma auina atu ai loa ile maota gasegase i Motootua lea na maliu ai lava. Ua faaalia e se ofisa sinia ole Matagaluega ole Soifua Maloloina le susuga Seve Sinei, e lei faamaonia poo le dengue fever le pogai ole maliu, ae toatolu ua maliliu ua masalomia ole gasegase lea le mafuaaga.
Ole taimi nei oloo ave toto e sue ona faatoa faamaonia lea. Ile masina o Iulai na lipotia ai ele falemai le amata oo atu o tagata i auga ole dengue fever ma e oo ane ile masina na tea nei ua 322 tagata ua faamaonia ole gasegase lea ua aafia ai.
Ole masina na tea nei na lapataia ai ele atunuu ele matagaluega ole soifua maloloina ina ia faamamā nofoaga e nonofo ma tautuufua ai namu ona ole siitia ole numera o gasegase ole dengue fever ua auina atu mo ni togafitiga ile falemai.
Ose fautuaga tāua mo le mamalu o Samoa o alaala i atunuu mamao ina ia utagia fautuaga mai le soifua maloloina pe a taunuu i Samoa ina ia puipuia mai ai i fiva o ponaivi. Ole tau susū ma vevela lenei i Samoa ma e mautinoa e lē faigofie io tatou tagata oloo malaga mai fafo mo malologa ma tafaoga ole Kerisimasi ma le Tausaga Fou ona tatali le vevela.
Peitai ole ufiufi lelei ole tino ini laei pe faaaogā kulimi ma suauu manogi e tutuli ese ai namu mai le tutū i tino ole ā lē taumate ose tapenaga lelei e alofia ai le maua i auga ole dengue fever poo le fiva o ponaivi a’o iai i Samoa mo tafaoga poo nisi faalavelave faaleaiga.
