E 15 pasi faamalū ea malulu na faataitai i le talafatai o le taulaga i le faaiuga o le vaiaso mo le fono a Malo Laiti tau Atiae o le lalolagi lea e fai mai i Samoa ia Aukuso ma Setema.
O i latou ua faauuina e faafoea ia pasi na agai ane i Apia ma amata loa ona faagasolo faataitaiga ina ia siaki poo lelei atoatoa ia pasi.
O le meaalofa lea a le Malo tele o Saina e iai pasi ia atoa ai ma taavale laiti lanu uli ua aumai uma mo le Malo auā lea taligamalo.
O le faaiuga foi o le vaiaso na taunuu mai ai se vaatele na faapea ona aumai ai ma nisi pasi e 12 faapea pasi laiti poo vans e 20 mai i le Malo o Iapani. O le fono tele lava lea ua faapea ona aumai ai lea fesoasoani a le Malo o Iapani e pei ona sainia i le amataga o le tausaga.
O lea ua toe o ni nai vaiaso amata loa ona vaaia le agai mai o le tusa ma le to‘a 3000 ia ua lesitala e auai i lenei fono tele ma o lea foi la ua faagasolo le tele o galuega auā le sauni atu ai o Samoa mo lenei taligamalo tele. O le afa aso atoa o le Aso Faraile na faatino ai le faataitaiga o pasi ma na maua foi le avanoa o le autusitala e agai ai i pasi eseese ma lipotia le tulaga o iai ia taavale peitai e lei taumateina lava le lelei o ia taavale ona e manino o taavale fou na faapea ona foai mai e Saina.
O lea foi na faataitai atu ai ma i latou nei ua mae‘a aoaoga i le faafoeina o pasi. E silia i le to‘a 30 i latou ua mae‘a ona faauuina e faafoea taavale mo le taligamalo lenei ma e lua vaiaso o le a galulue ai i latou ua faauuina i luga o pasi ma taavale laiti faapea ai ma vans o le a faaaogāina i lenei taligamalo. O le fanua o le malo i Sogi lea ua faamautu ai taavale fou mai i le malo o Saina ma o iina foi ua fuafua e faatutū ai ma taavale ia ua taunuu mai i Iapani.
