O le sauni ai o le malaga a le vaalele o le Virgin Samoa e tuua laufanua i Faleolo i le po o le Aso Tofi 13 o Aukuso i lana faigamalaga mo Niu Sila, ae tupu ai loa se vevesi i le va o se tama talavou ma se faifeau ma lona faletua. Na faapea se faamatalaga a se tasi o tina na malaga mai ai i lea po, e musu e faailoa lona suafa, o lea vevesi na tupu tonu lava i ona luma a o faatalitali le taimi e mae‘a ai ona faanofo le pasese a le vaa.
O le mafuaaga o lea faalavelave na mafua ona o ni vaega i totonu o le vaaalele e tuu ai ato; e o atu le tamaloa lea ma lona faletua, ua tumu luga a‘e o laua i le mea o loo tuu ai ato, ma o iina sa lē maua ai e to‘a o le faletua ma ia fai ai i lona toalua e tu i luga e tau‘ai ese ato ia i luga o laua o mea ia e tuu ai a laua ato.
Sa faatino e le tamaloa lea vaega, ae sa tulai mai le tama talavou ma fai i ai e aua le faia fua ana ato o lea ua leva ona tuu ana ato i luga iina. O ii foi o loo ma nonofo ai, ae faaaogā ane isi vaega ia e tuu ai o la e avanoa.
O le taimi loa lena ua vaovaogata ai ma le fofoga o le faletua i upu leaga uma ua lafo i ai i lea alii talavou, ae sa tali lava i ai le alii e tuu lana ato, ae atili ai le agi o le afā a le faletua lea.
Sa logoina e le alii le tamatai o loo vaaia le aufaigaluega a le vaalele mo se fesoasoani; na toe foi le tama i lona nofoa ae mulimuli i ai le teine o le vaalele, auā le fofoina o le faafitauli.
O le faamatalaga a le tina lipotia maia lenei faafitauli, e lei nofo lelei ifo le alii i lalo ae aapa atu le tamaloa faifeau ma sosoo ana tu‘i i le tama ma kola mai i tua le ofu ma sasae, ma toe sasau atu isi ana tu‘i ma manu‘a ai loa foliga o le alii talavou ma sau ai le toto, ae lē o mapu foi le laau suisui a le faletua i upu sā ua lafo.
Na oso le tina lea ma fai i le faletua i lona lē mafaufau, ae faasaga ane foi le faletua ma faamapuni le gutu o le tina lea. O le mea na faateia ai le pasese, o le taimi na manu‘a ai foi le ulu o le tamaloa, ae alaga ai le faletua ma fai i le tama talavou, “e te iloa ua leaga le ulu o le faifeau”.O inā na toe oso atu ai loa le tina lea sa iai i le malaga ma faapea atu i le faletua, ‘Oi e te iloa lava la o oulua o faifeau ae se‘i e vaai i au upu sa lafo ua pei oe o le tagata taatua,’ ma o iina sa lē toe lagona ai le leo o le faletua o le tatou faifeau.
Na tutuli i lalo e le teine o le vaalele le faifeau ma lona faletua, ae lei o. Sa oo atu foi security e ave i lalo ae lē mafai lava, ma le faaupuga o le a vili le la loia, ma e tatau foi ona ave ma le alii lea sa latou vevesi i lalo.
Na faamalamalama i ai e le teine o le vaalele, o laua na tupu ai le vevesi, lona uiga o laua e tatau ona o i lalo. Na iu ina vili leoleo mo se fesoasoani, ma o iina sa mafai ai loa ona ave i fafo le faifeau ma lona faletua ina ua taunuu atu i ai malu o le malo mo le fofoina o le faafitauli.
O le malaga a le Virgin Samoa na fuafua e tuua Faleolo i le 9.30 o le po lea o le Aso Tofi, 13 o Aukuso, ae na tuai ona o lea faafitauli na tupu, ma na faatoa mafai ona faaauauina le malaga i le 10.30pm i lena afiafi.
