O le afiafi o le Aso Faraile na molimoli atu ai le sa o le Afioga Aiono Dr Fanaafi Le Tagaloa i le malumalu o le Ekalesia Faapotopotoga Kerisiano Samoa i Fasitoo-uta aua lona sauniga faale-Aiga atoa ai ona toe sauniga na faatautaia i le Aso Toonai.
O lona sauniga faale-Aiga na molimauina ai nisi o polofesa faaleaoaoga mai i Niu Sila faapea Ausetalia na malaga mai lava aua le molimauina o le sao o lenei tamaitai i le atina‘e o aoaoga e le gata i Samoa ae faapea foi ma atunuu mamao.
O se tagata e maualuga le laasaga o ana aoaoga lea na avea ai foi ma faiaoga o le Iunivesite o Aukilani i Niu Sila a o talavou lava o ia.
E manatua le tala ‘ata i le agai atu i lea galuega ae mulimuli ane see ese ai aua o le toatele o ana vasega e matutua ai ae e lei foi ai lava foi le faamautu ai o lona sogasoga ma lona saili malo ina ia avea ma se tasi e amanaia i le tomai faafaiaoga.
O le faagasologa mai o lona soifua o se tagata e a‘oa‘o atu na molimau ai foi sui o Aoga a Ekalesia e le gata i le EFKS ae faapea foi i aoga faafaifeau i Malua ma Piula lea na ia faafoea le tele o aoaoga aemaise foi i le gagana Samoa.
Mo le Malo o faailoga taualoa a le atunuu (Order of Merit) na oo lava i ai le faaaloalo ma le amanaia e le malo o Samoa o taumafaiga a lenei tamaitai.
O lona sao i upufai o Malo na saunoa i ai le Alii Palemia o ia lea na ave i ai le folasaga a le malo i le soifua auauna o lenei tina, ae e pei ona ta‘ua e le Susuga Tuilaepa Lupesoliai Sailele Malielegaoi, e ui lava i le tele o ona tiute na tofia ai o lana unai i le gagana Samoa ina ia mautinoa e tamau e tupulaga fai mai na vaaia i le tele o ona tofiga faafaiaoga ma le pule o a‘oa‘oga i totonu o Samoa.
O le faauuga talu ai nei a le Iunivesite o le Amosa o Savavau na faapea ona iai lenei tina ma na manino le fiafia ma le mitamita i le aoga laitiiti lea e pule ai le tasi o ona alo, le tamaitai ia Donna ma e aoao uma mataupu i le gagana Samoa e pei ona molimauina ai i galuega a le fanau.
Na tulai mai i le tofi faipule mo Aana Numera Muamua i le suafa Aiono ma o le faafoega o le sa o lenei tina i ona toe sauniga na faatautaia uma e le afioaga ma le itumalo na tulai mai ai o se faipule, o se matai ma o se taitai foi i ona vaitaimi o tulai mai ai i le tofi.
O le tina ia Aiono Dr Fanaafi Le Tagaloa e toafā ona alo, toatasi le alii ia Semisi Larkin ma tamaitai e toatolu ia Leilani, Donna ma Fanaafi Le Tagaloa.
E pei lava o lo latou tina, o ni fanau nei a le atunuu ua maoae le maualuga o le itu tau i aoaoga ua faapea ona o latou ausia i le tomai faafomai, faafaiaoga ma le faaloia ma o molimau ola ia o ana foi taumafaiga ina ia unai aoaoga i fanau aua e le gata i le tomai poo le poto salalau ua faaeaina ai lana fanau ae e leai se tasi e faaletonu i feagaiga faaleaganuu i soo se folasaga ua molimauina le auai i ai o ona alo.
O le afioga i le Alii Palemia na faapea ona tauaao atu le tagavai o le Malo i le tamā ia Le Tagaloa Pita e manatua ai lenei toa o le atunuu ua tuua le malo.
