Ole kaseti lona 30 ale afioga ia Lealaitagomoa Asuao Felise Miakaele Toluono ua faaigoaina “Ua Sili Ofe” ua faamavae aloaia atu ai ile atunuu aemaise o ana paaga ile taleni ole musika. E pei ona silafia ele mamalu ole au faalogologo ma ia latou e fiafia i musika a lenei tamalii ole atunuu, ua silia ile 300 fatuga o musika suifefiloi ua mafai ona tusia ma fatuina ele afioga ia Lealaitagomoa Asuao Felise Mikaele mai lava i lana kaseti muamua seia oo mai ile CD lona 30.
I totonu ole taimi umi sa galue ai lea tamalii ile musika ua le gata i pese o CD, ae sa ia pueina foi ni ata tifaga e faatatau lava i musika oloo ia fatuina, ma ose tulaga maualuga lea tulaga ua ausia e lenei tamalii ole atunuu talu ona iai i totonu ile mea oloo militino ai mafaufauga ole au fatupese.
Ole 18 o tausaga o Lealaitagomoa Asuao Felise Mikaele na amata ai ona ia tusia pese ma fatu, ma usuusu i taimi o evaevaga. Ina ua amata ona tuputupu a’e ma ua faalautele lona mafaufau ile tāua ole musika, na fiafia ai loa e faalogologo i musika a Alapati ma Maria ole Penina o Tiafau ma lona naunautaiga e fia avea o ia ma Alapati, auā ole tele lava o taimi e nofonofo ai lava ma ta lana kitara ma usuusu pese a Alapati ma Maria.
Alua’i alua’i ua oo ile taimi ua iai le suiga ole musika ile isi augatupulaga, e pei ona iai le Punialavaa ma le Tiamaa, o iina na toe tilotilo ma vaavaai ai ile tele ole suiga ole musika e nei aufaipese, ile toe fauina o pese ma le usuina o pese, ma le faiga o leo ole aufaipese.
Ina ua malaga mai i Niu Sila na amata ai loa ona tusitusi pese ma tuufaatasia auā le tapenaina ole kaseti muamua sa faaigoaina ole “E Faia Mo Oe” lea sa pueina ile tausaga e 1988. Ole tausaga e 1992 na pueina ai lana CD lona 6 lea sa iai le pese ua faaigoaina ole Tama Samoa (ua logo i tino matagi lelei) ma ole kaseti lena na suia ai loa lagona o tagata ma le faalogologo o tagata i ana fatuga, ua amata ona fiafia ma ua iai le naunautaiga e fia faalogologo i ana musika.
Ole taimi foi lena faatoa amata ai ona tau aliali a’e i luga ma iloa lona tagata ele toatele ole atunuu ile taleni pese. Sa le toe faatamala ile tapenaina o ana musika ile atunuu auā o lea ua ia iloa e tāua tele musika faasamoa mo tatou tagata Samoa. Ole tele o pese ale afioga ia Lealaitagomoa Asuao Felise Mikaele, e tusia ma faatatau ini alagaupu faasamoa auā o iina oloo iai le ‘oa ole gagana ale atunuu, ae oloo afifi mai ai foi ma a’oa’oga tāua mo tatou lava tagata.
1997 sa avea ai ma sui ale Kiwi Pacific Records International mo le Telecom Music Awards ile vaega ole Best Polynesian Album of the Year. Tausaga 1999 – 2000 na tuu atu ai lona tau’au e pese ile amataina ole sailiga seleni mo le fausia ole malumalu ole EFKS i Napier ale susuga ile faafeagaiga ia Rev Sani Ng Siu seia oo ina umusa le galuega ile tausaga e 2006. Tausaga 2001, na toetoe ai a tapuni le Kolisi o Sanele, ae na sau ai le aveai ale aoga ia te ia, e manaomia lana fesoasoani ise koneseti e fia faia i Savalalo, ae lagolagoina ele Chanel College Old Student Association ma le Vailima e toe saili ai se seleni auā le toe faaauauina pea ole aoga auā lea toeitiiti lava a tapuni. Tele foi nisi fesoaosani sa ia galue ai i nisi o faalapotopotoga ma aulakapi i Niu Sila nei, Ausetalia ma Hawaii.
O nei galuega faa-Samaria agalelei sa fai fua uma lava e aunoa ma se totogi.
Ua 67 tausaga le matua ole soifua ole afioga ia Lealaitagomoa Asuao Felise Mikaele, ma ua ia lagona ua alagatatau ona faamuta lana tautua ile musika, ona ua le o toe tutusa foi le malosi o lona tino, mai i ma’i sa feagai ai. Lea ua faamavae aloaia atu i lana cd ua faaigoaina “Ua Sili Ofe”, ma momoli atu ai ma lona agaga faafetai tele ile tapuaiga ale atunuu, i uo ma e masani aemaise o ona aiga uma ile lagolagosua ao iai ile tautuaina o Samoa ile musika.
Talosagaina foi le atunuu, o a ni lelei talosia ia aogā, ao a foi ni faaletonu ia faamagalo le leo ole auauna, aua e poto le tautai ae sese lana atu i ama.
E tele mavaega ta’uta’ua o Samoa, ae ole mavaega sili ia te au ole mavaega lea i laufanua ole Aiga Taua’ana ma le latou Tama, ale masaga piipii o Taema ma Tilafaiga. E ui lava ina ole a faatofa, fefuliai o ta tua ile taimi muamua, ae ia tumau lo ta’ua fealofani.
Ole aso 15 o Tesema ole faafiafiaga mulimuli lea ale afioga ia Lealaitagomoa Felise Mikaele i Papatoetoe ma faatofa atu ai loa ile atunuu.
