Ole mata’u ile Atua ole amataga lea ole po. Ole masina o Tesema 2015 na faauuina ai le tamaitai o Jessie Faalele Fuesaina mai lona faaailoga ole Bachelor of Commerce, ile Iunivesite o Griffith i Queensland, ae ole aso 9 ole masina lenei o Novema 2017, na faauuina ai lona faailoga ole Master of Accounting ile Iunivesite lava o Griffith. O Jessie ole alo ole susuga ile faafeagaiga ekalesia ale Aso Fitu aso ole Alii ia Pr Faamalologa Fuesaina mai Lefagaoalii Safune Savaii ma le faletua ia Tamara Fuesaina mai Afega ma Safotu.
O Jessie ole lona lua lea ole fanau, matua Maxine, lona tolu le tamaitai o Pam, ae laititi pe uii si o latou tuagane o Panojess.
Ole upu ale faafeagaiga e tuu taliga pea i lana fanau, e soo se atalii, ma soo se afafine e ola mata’u ma ola faapaiaina ma ola usiusitai ile Atua e ala i lona finagalo ma ola usiusitai i mātua, ma faamuamua le Atua, e Na te faatietie oe i mea maualuluga, ma faaopoopo mea uma e manao iai lou loto. Ole viiga sili ile Atua ona ose masina o faamanuiaga lenei masina o Novema, ona ua iu le tausinioga ole tamaitai o Jessie ma faamanuiaina ile Master of Accounting sa tau ai. Na faamanatu ai foi ma lona 21 tausaga, ae ua atoa ai foi le 55 tausaga o lona tuaa le susuga ia Pr. Faamalologa Fuesaina. Ole faanaunauga ole tamaitai ia Jessie e lu’itau ai pea le tele o i latou o tau faavaivai ile olaga a’oa’oina, e toe fia saili le isi ona faailoga, a’o maua le avanoa o lona olaga talavou. O nei mea uma ia faasilisiliina ai le viiga o lo tatou Atua. Ole tama poto e fiafia ai le Tama, a’o le tama valea e faanoanoa ai le Tina. Ole ola ma le poto o mea ale Atua e pule foi le Atua, i ia mea uma.
Momoli atu ai faamanuiaga:
E mai le ta’ele o ma’ua agaga, Pr. Faamalologa & Tamara Fuesaina faapea uso ia Maxine ma Pam ma le tuagane ia Panojess; Aunty Lina, Aunty I’u ma Tapaea malaga mai i Niu Sila, Aunty Leati, Tua ma le fanau, Uncle Laupa ma Iva ma le fanau, faapea aiga uma e aualofa atu ai ia Jessie Faalele Fuesaina. Malo le tau! Malo le finau! Malo le filigā!
Manuia lou 21 tausaga faapea le faaeaina o oe i lou taumafai ua tau lau o lou faamoemoe.
