E to‘a 16 faifaatoaga ua faamanuiaina i le ta’i $7,000 tala ona o se polokalame na faagasolo mo faifaatoaga faipisinisi i le atunuu e toe atiae ai a latou atinae tau faatoaga na faaleagaina ona o le afā o Eveni i le tolu tausaga talu ai.
O se vaega lenei o le fesoasoani a le Malo i faiga faapaaga ma le Faletupe o le Lalolagi le World Bank e fesoasoani ai ia Samoa ma mafatiaga o le afā. Ua patino lava la le fesoasoani lenei mo le au faifaatoaga ma le au faifaiva.
O le vaega lona lua lenei o lea fesoasoani. E faatino muamua la aoaoga mo faifaatoaga e to‘a 100 na talosaga mo lenei avanoa e aofia ai le aufai faatoaga kofe, koko Samoa, i latou e fai faamoegapi mo le gaosiga o le honey, o i latou e fai togalaau faisua ma togalaau ‘aina.
O le mae‘a la o aoaoga e maua ai le tusipasi, ma e asia foi a latou galuega ua toe faatino mo le faaleleia o a latou faatoaga, ona maua atu lea o le tinoitupe lea auā le faaleleia atoa o nei faatoaga. E mulimulitai lava foi la le Matagaluega o Faatoaga ma Faigafaiva i nei galuega pe o faamaoni ona toe faaleleia auā le ausia o le fesoasoani ua tufatufa atu nei.
Faaalia e le alii Minisita o Faatoaga le afioga Le Mamea Ropati o se taumafaiga tāua lenei i le unaiga lava o le faaleleia o faatoaga na faaleagaina i le afā ma o le faamoemoe ia toe faafoi le tupe maua o le tamaoiga o Samoa i le maualuga sa iai a o lei afaina nei faatoaga i le afā o Eveni.
O le vaega muamua na ave ai le ta‘i $1000 (afe tala) i faifaatoaga e ala lea i le ave o ia tupe i faleoloa o loo maua ai meafaigaluega ae agai i ai faifaatoaga taitoatasi ma aumai ai a latou meafaigaluega auā le faaleleia o a latou faatoaga na faaleagaina.
O le mau a le tele o faifaatoaga ua faafetai i le faamāmā avega a o taumafai ai ina ia toe faaleleia le tele o nofoaga na faaleagaina ona o nei faalavelave faalenatura.
O le vaega muamua la lea o le aufaifaatoaga na aofia i lenei taumafaiga ae o loo faagasolo lava aoaoga a isi tagata e atoa i ai le to‘a 100 na filifilia mo lenei faamoemoe.
O le vaega lona lua lenei o i latou ia ua faamaonia le faatau atu i le atunuu aemaise foi atunuu i fafo o a latou fua o faaeleeleaga ma e aofia ai foi nisi o fai maumaga o loo ua avatu nei i Niu Sila a latou uta talo mo le faatauina.
O le taimi lenei e lei ‘afa lava le tamaoaiga o maua mai i fua o faatoaga ma o le faamoemoe tele lea o le matagaluega ina ia toe foi Samoa i le ‘afa o lana tupe maua pe sili atu foi mai i faatoaga ma faigafaiva i totonu o Samoa.
E ese mai i le fesoasoani lenei o loo faaauau lava foi le ponesi ua maua e nisi o le aufaifaatoaga kofe, koko ma le popo ina ia toe unai ai nei faatoaga i totonu o le atunuu ma e tailua i le tausaga ona maua le ponesi lenei e fai faatoaga o ia togalaau.
