O le viiga ma le faamanū e maualuga pea lea ona faafoi i le Atua Silisili Ese e toatasi ona o Lana pule faasoifua ua mafai ai ona aulia mai e le uluai toa o le talalelei i Brisbane lona 86 tausaga.
O le susuga i le Toeaina Penisione malolo manumalo e pei ona lausilafia na uluai amataina le Ekalesia EFKS i totonu ole aai nei o Brisbane.
Sa tuufaatasia le Matagaluega EFKS a Kuiniselani ma faailoa aloaia ai e le Toeaina Faatonu ia Rev Kerita Reupena le aso soifua o le susuga i le Toeina Penisione Malolo, ma faapea ai ona lagiina le pese e faamanuia ai lona 86 tausaga a o molimauina e Ekalesia e 22 a le Matagaluega EFKS.
O le agaga fiafia o le Toeaina manumalo ona o le tausiga alofa a le Atua i lona soifua e ui ua 86 tausaga le matua peitai o loo ia faia pea tiute ma faiva masani i totonu o le aiga.
O le malosi faafouina o loo tuutulu‘i pea o loo mafai ai ona ia savali i taeao ma afiafi taitasi.
E momoli foi lona agaga faafetai i si ona faletua ia Tima Tu‘iai ona o le tele o mea lelei o loo ia faia mo ia, aemaise le nofoaalo ma o latou aiga o loo mafai pea ona agalelei mo i laua i soo se taimi.
Alofaaga e auina atu i le susuga i le Toeaina ia Rev Tauaaga ma le faletua ia Senerita Mataafa ma le nofoaalo faapea le Ekalesia EFKS SouthWest Brisbane, Rev Aukilani & Mauinuuese Tu‘iai & Samuelu (faiaoga i Malua Samoa), Manulua & AnneMarie Tu‘iai & fanau, Alapati & Shavanna & aiga (Auck NZ), Taimane Agnes & Francis Aruafu i Canberra.
Alofaaga foi e auina atu i le tina matua ia Ipiniu Mataafa, tina matua ia Peka Petaia ma le nofoaalo, Rev Petaia ma le faletua ia Sarai Tu‘ifao ma le nofoaalo, Rev Lance ma le faletua ia Lite Tautiepa & nofoaalo, Rev Milo & faletua ia Talamasinei Faaleava, Nanai Sio ma Toafa Vei, ma le aiga atoa, faapea le Pulega Saute ma le Matagaluega EFKS a Kuiniselani, i le aufaigaluega paia a le Atua ma faletua faapea aulotu taitasi.
O alofaaga faasilisili ma le faaauau pea e lē mafai ona mavae mai isi au tautoga le faletua manumalo ia Tima Tu‘iai. Alofaaga foi e auina atu i le Pulega a le Penina o Asuisui Switch 1197am.
Manuia tele le atoaga o lou 86 tausaga Samuelu Tu‘iai, agalelei le Atua ma toe faaopoopo nisi tausaga se tele i lou soifua e tatou te mafuta ai pea i luga o lenei fogaeleele.
