Auatalavou Mauga Laki

Auatalavou Mauga Laki

Ole autu na faamamafa iai tapenaga a autalavou taitasi ale Sinoti i Matu ile afiafi ole Aso Toonai e ala lea i polokalame ole Aso Maliu, e faapea “Laasaga ile Ola Fou” e faaavae lea ile ola toe fuataina.

Ole faamoemoe maualuga ina ia lagona e talavou ma tagata uma le laasaga fou na saili ai Iesu ile tatou ala i malo, e ala i lona maliu ma lona toetu manumalo aemaise ai le galuega lilo ale Agaga Paia. Ole polokalame na galulue ma taulamua ai le aufaigaluega Paia ale Atua i totonu ole Sinoti i Matu a Aukilani e pei ona ta’ita’ia e le afioga ile Sea ia Masunu Utumapu ma le faletua ia Senerita Utumapu faapea le susuga ile faafeagaiga Misionare ia Risati ma le faletua ia Mabel ma saofa’iga ale aufaigaluega.

O avanoa e lē aumaua e galulue faatasi ai autalavou taitasi e molimau faatasi ai le galuega ole talalelei, ae ua avea lenei polokalame ma galuega e avea ai tagata uma ma tino e tasi ma le loto e tasi ile talalelei a Iesu. Ua femolimaua’i foi le Agaga Paia ole Atua e ala lea i tapenaga a susuga i faafeagaiga ma autalavou taitasi sa molimauina le upu folafola ma le talalelei a Iesu.  Ole afioga ile Sea ia Masunu Utumapu na ia saunia le tatalo amata ona sosoo lea ma le folasaga ole afiafi e le susuga ile faafeagaiga ia Rev Felise Tupuola.

Autalavou Meotisi Henderson

Autalavou Meotisi Henderson

Ole tatalaina o polokalame ole afiafi na saunia lea e le susuga ile faafeagaiga ia Rev Michael Collins faapea le susuga ile faafeagaiga ia Neru Tiatia ma le latou autalavou mai Kelesetone, ae na faaautu le latou molimau ile Vaitau ole Eleni, ma Tofootofoga ole Ola faatuatua.

Vaega lona lua, ole autalavou mai Mauga Laki ile susuga ile faafeagaiga ia Rev Fogalele Iosia ile latou autu e faapea Aso Sa o le Pama. Ole autalavou mai Otahuhu ile susuga ile faafeagaiga ia Evile Loli sa fai lo latou sao ile Faamamāina ole malumalu.

O Rev Iopu Taavao ma le autalavou mai Mesiana ole latou sao i lea faamoemoe ole Maliu o Iesu ma le falelauasi le tupu ona o lona alofa. Ole autalavou mai Henderson ile susuga ile faafeagaiga ia Tapu Malo na latou saunia le toetu manumalo mai ole Keriso.

O nisi o autalavou e aofia ai Te Atatu ma Onehunga na latou saunia pesega e faaautu lava ilea utu filifilia ole aso, ona taualuga loa lea ile autalavou ale afioga ile Sea ole sinoti i Grey Lynn ma le latou autu e faapea Galuega Lilo ale Agaga Paia. Ole lona lua ai lea o polokalame ale Sinoti i Matu ua faatinoina i totonu ole hall ale ekalesia ole Church Unlimited Auditorium i Te Atatu ma sa vaaia ai le suiga tele i lea polokalame ile agai atu ole mamalu ole atunuu e molimauina le matagofie o tapenaga a autalavou e ala ile Maliu ma le Toetu o Iesu.

Autalavou Metotisi i Kelesetone

Autalavou Metotisi i Kelesetone

Ua lē faapito manu ia tasi pe faapitoa foi le polokalame na’o autalavou ale Metotisi i Aukilani i Matu, ae ua tatala le avanoa ile lautele ole atunuu e agai atu ai e molimau le lelei ole Alii a’o faasoa mai fanau talavou.

Sa molimau eseese tapenaga ole afiafi mai autalavou taitasi, ae sa faafaigofie ona oo ma momoli le feau ole talalelei i loto ma agaga o tagata ona ole galuega lilo ale Agaga Paia e pei ona molimau iai le afioga ile Sea ile faaiuina ole polokalame.

Sa faailoa foi e le susuga ile faafeagaiga ia Rev Masunu Utumapu, ua telē le suiga ole polokalame i lenei tausaga, mai le polokalame muamua, ona ole tumutumu ole hall sa faatinoina ai le faamoemoe ile mamalu ole atunuu.

Ma o lona lea agaga faafetai ile Atua ona oloo mafai pea ona maua avanoa e fai ai le galuega faatala’i ale ekalesia mo agaga ole atunuu, ma ole finagalo foi le o Iesu mo i tatou, ia tatou o atu e fai nuu uma lava ma soo o Keriso.

Autalavou Otahuhu

Autalavou Otahuhu

Comments

comments