O le atoaga o se tasi tausaga faaopoopo i le soifua o le tina ia Iraisa Page, ua o se faamanuiaga mo ia e pei ona molimauina i le po o le Aso Toonai o le faaiuga o le vaiaso, na tumutumu ai lona aiga, o lana fanau ma le auvalaaulia i le Dream Centre i Manukau i le faamanatuina o lona 60 tausaga.
O ia o se tina, loto maualalo ma le galue malosi i totonu o le Ekalesia, o se vaega o le molimau a lana faifeau le Susuga Rev. Ben Dykman o le Ekalesia Presbyterian Church i Greenlane, o ia foi na faia le sauniga lotu faapitoa e tatala ai le faamoemoe ma amata ai le faamanatuina o le 60 o Iraisa.
Matagofie tapenaga uma o le aso soifua o le tina, aemaise o le vaaia o lona malosi, e ui e lei leva ona mae‘a lona taotoga i le tuli, pei ona taua e se tasi o le fanau, Tala Page, ae pei o se vavega i lea po le tia‘i faafuasei o tootoo o le tina ia Iraisa ae siva ma le malosi i le fiafia i le faamanatuina o lona 60 tausaga.
O ai se a lē fia saasaa ma fia siva i le agaga faafetai i le tausiga a le Atua i le tina ma le fanau, i nei tausaga e tele ua maua o lona soifua. Tele nisi o faafiafiaga na taualuga ai le taumafataga tele o le ‘aiga fiafia o le aso fanau o Iraisa, aemaise o se avanoa na faatasitasi uma ai ona uso ma lona aiga ma si ana fanau, ae faapea le mamalu o aufaigaluega a le Atua, o lana aufaigaluega e pei ona galue ai le tina mo le 30 ma ona tupu tausaga i le falemai i Middlemore, na maua uma le avanoa e fiafia faatasi ai i lea po.
Manuia tele lou 60 tausaga Iraisa Page!
