O le agaga o le faafetai ma le viiga o le Atua na alagaina i le faleaiga o le Valentine i le afiafi o le Aso Toonai, 8 o Novema e susuga i faafeagiga ma o latou faletua, aiga uo ma ē masani aemaise o le Ekalesia Aso Fitu a Magele e pele i le agaga o le tamaitai ia Rola, i le faamanatuina o le atoaga o lona 21 tausaga talu ona soifua mai.
O le faatupuina foi lea o le fiafia o mātua ia Taulalovasa Kiliona ma le tina ia Pepe ona ua aulia e lo la alo le isi laasaga fou o tausaga o le teine talavou.
O upu timata na saunoa i ai le taitai o le sauniga ia Iosua Vaafusuaga e faapea, “faamanuia i mātua ua maua ni fanau, ae o le tama ma le teine talavou, Ia e mata‘u i le Atua a o talavou lava oe.” O se luitau na faigofie ona lagona e tagata ona e tāua i mātua toe aogā i fanau.
O le afioga ia Malagamalii Alefosio sa fai ma fofoga o le aso, ma sa vaaia le laufofoga fiafia o le auvalaaulia ma le lē popole o se tasi i le tau, auā o loo faasalalau uma lava e le MC uiga o le tau ma tala i taaloga.
Na sosoo ma le foaiina o le ki e pei ona masani ai aso soifua faapenei, ma o le tamā ia Taulalovasa Kiliona na tauaaoina le ki mo si ona alo, ae o le tina ia Pepe na saunoa i le talaaga o le tamaitai fai aso fanau.
Na matuā faamalieina le auvalaaulia i le tautua a le Valentines auā o le auga lea ma le faamoemoe o le aso o le taumafataga. O le susuga i le faafeagaiga ia Apineru na saunia le tatalo e faapaiaina ai le keke, ma lufilufi ai loa auā le auvalaaulia ma faaiu ai loa i faaaloaloga i meaalofa seleni mo susuga i faafeagaiga na auai.
O le tamaitai ia Rola Taulalovasa o le lona lima lea o le fanau ma o loo galue nei i le kamupani o le Foodstuffs i Manukau.
