O le viiga ma le taulaga faafetai i le Atua na mua i ai le faamoemoe o le faamanatuina o le atoaga o le 21 tausaga o le atalii ia Steve Leatuau i le taeao o le Aso Toonai ua mavae. O ona aiga, o uo ma ē masani sa auai, ae faapea foi i susuga i faafeagaiga ma o latou faletua sa faatasi uma atu i le patipatia lea o isi tausaga o lona soifua.
O le malumalu o le Ekalesia Aukilani Assembly of God Samoa i Magele na faataunuuina ai lea faamoemoe. O le susuga i le faafeagaiga ia Saaga Tautalafua na faafeiloaia le mamalu o le auvalaalia ma taitaiina le viiga, ae o le upu faauuina a le Atua e tomatau ai le olaga o le atalii aemaise o le auvalaaulia uma sa auai na fofogaina lea e le teuoloa a le Ekalesia aoao le susuga i le faafeagaiga ia Fereti Toleafoa.
O le lui mo tagata uma, “e lē o le tele o aso ma tausaga e te ola ai, ae ia aogā ma faaaogā tatau aso ma tausaga, e filifili foi e le tagata ona ala ae o le Atua na te faatonutonu.” Sa faapea foi ona faaee lima o le aufaigaluega i luga o le atalii mo se tatalo faamanuia lea na fofogaina e Pastor Toleafoa Siu.
O le molimau i le olaga o le atalii na tagi talatala ai si ona tamā o Leatuau Siu i le usitai ma le alofa o lona atalii ia i laua, auā o laua sa faafaileleina mai lava nei tamaiti a o laiti.
O Steve o le fanau o fanau a le toeaina ia Leatuau ma le tina ia Tuafono. Ta‘ua e le tamā le faigata o la aso i Samoa a o la taumafai e putiputi le la fanau auā se lumanai lelei, peitai ua faamanuia le Atua ma maua avanoa i lenei atunuu ma ua la vaai ai i faamanuiaga i le la fanau ua maua galuega ma toe tali atu i le tausiga o laua.
Na ia foaiina foi le ki ma lona agaga fiafia i lona atalii, o le ki e loka ai faitotoa o seoli i mea leaga uma e taumafai e faaosoosoina ai lona olaga talavaou, ae tatala ai le faitotoa o le ola e faavavau mo manuia i lona olaga faaaogāina mo le Atua ma lona finagalo.
Ae sa faaalia foi loimata faafetai o Steve i le taumafai atu o se upu i ona mātua e tusa ai ma le laua tausiga faamātua aemaise o le aoaoina o lona olaga ina ia manuia ma maua sona lumanai lelei.
O le maualuga ma le tumutumuga o lea aso o le mafuta faatasi o aiga o mātua o Steve ma ona aiga lotu, ua felosipi i le sauniga ae o le taumafataga na saunia e le aiga na atoatoa ai tino o le tama i le mafutaga.
O faafiafiaga na momoli ai faamanuiaga ma alofaaoga o ekalesia taitasi, mai autalavou a le Assembly of God Samoa i Hunters Corner i Papaoetoe, autalavou mai Magele Sasae faapea faafiafiaga a Aukilani Assembly of God Samoa.
O le fofoga o le aso o le tuaa o Steve le tamā ia Leatuau Siu ma o ia foi sa nafa ma faaaloaloga mo susuga i faafeagaiga ma le mamalu o le auvalaaulia.
