O le ofoina o olaga o tupulaga talavou e gasese ma lufilufi taumafa mo tuaa ma mātua i totonu o aiga, ua o se luitau i nei vaitaimi i le saoasaoa ma le pisi o olaga fai i totonu o atunuu o papalagi, ua avea nei ma nuu ma aiga i le tele o Samoa.
O nisi lava foi aiga ua matuā lē maua lava ni taimi o fanau e faatino ai lea tautua ona o galuega ma aoaoga, ae a maua foi ua na o le tasi pe lua ni aso o le vaiaso, ae faafetai ia o loo maua pea le sootaga ma nai fanau, ae i le ekalesia a le Hume AOG i le pitonuu o Camplefield i le aai o Melepone, ua amataina nei le tautua a nisi o le autalavou, mo le gaseseina ma le lufilufiina o taumafa mo faamoemoe fai o le paia ma le mamalu o le atunuu.
E lei iloga ona ofi atu i le faalagamaea o loo tufi taufao e nisi o pisinisi i le lautele o le malae, ona e fou, peitai o le agaga fiafia o lenei vaega o le autalavou, ona ua tafa le finagalo o le faafeagaiga ma le laulau (board) ma faamatuu atu le faatagaga e faatino ai la latou miti i tua atu o meafai a la latou lava ekalesia, lea sa faataitai ma amata tapena ai la latou manulauti.
Na saunoa se tasi o tina o lenei vaega o le autalavou, ua silia ma le tausaga o latou tautuaina la latou ekalesia i a latou taleni kuka ma le laulauina o taumafa i o latou faamoemoe tetele sa faatino. Na o latou lufilufi ma gaseseina taumafa o le koneferenisi tele a le ekalesia aoao a Ausetalia sa fai i le aai o Melepone ia Novema o le tausaga talu ai, lea e silia ma le fāselau le au usufono.
O a latou polokalame tetele foi o le Kirisimasi ma le Tausaga Fou aemaise foi o mafutaga a faifeau ma i atunuu eseese sa fai atu i lo latou falesa, o ina na maitauina ai e le faifeau ma taitai le matagofie ma le maualuga o le lelei ua oo i ai le tautua a alo ma fanau, lea ua tuu atu nei e faataitai ona tatala apaau o le miti, pe tua mani ā, ae e leai se mea e faigata i le Atua o le autalavou.
