O laufofoga fiafia o le aufaipese a le Ekalesia Metotisi i Grey Lynn i le taeao o le Aso Toonai ua mavae sa avea ma vailaau sili ona tāua e faafeiloai ai le mamalu o le atunuu ma aiga faapea uo ma ē masani na agai atu e molimauina le tatalaina o le latou uluai taumafaiga e ala lea i le CD pese ua faaigoina o le Fetu Ao.
Ua lē gata i aiga ae ua faafeiloai ai foi le auai atu i ai o le afioga i le faipule o le itumalo o Magele ia Su‘a William Sio faapea le Whau Local Board Chair ia Catherine Famer. E mulimuli ane le malu taeao ae ua faamalieina loto o tagata i laufofoga fiafia ua faaalia e le fanau e oo lava i nai tamā ma tina o loo auai i lenei aufaipese.
E lei faaitiitia le agaga o le faafetai ina ua tulai le fofoga o le faasinoti a Aukilani i Matu ia Rev Alesana Asiata e taitai le sauniga i lea taeao. Aemaise ai o siufofoga mālie o le aufaipese sa lagiina pese o le lotu lea sa peseina ai nisi o pese o le CD.
O le faletua o le taitai o le sauniga sa ia ootiina le lipine e tatala aloaia ai le taumafaiga sa galulue punouai ai le Ekalesia aemaise o le nofo tatalo ma le tu‘i o le mulipapaga a tamā ma tina matutua o le Ekalesia.
O le Ekalesia Metotisi i Grey Lynn o le uluai lotu Metotisi muamua lea sa faatuina i totonu o Niu Sila i le tausaga e 1964 ma o loo galulue ai le afioga i le Sea o le faasinoti Aukilani Matu ia Oianatai Matale ma le faletua ia Faapaia Matale.
O le saunoaga a le afioga i le Sea o le faasinoti i Matu ia Oianatai Matale o loo amata ai pese o le CD ona faasolosolo ai lea o pese e 13 ua mafai ona tuufaatasia i totonu o lenei faamoemoe. O le fale pue pese a le susuga ia Emmanuel Ensink sa ia pueina lenei galuega fita ma sa pueina lava i le hall a le Ekalesia Metotisi i Grey Lynn.
O lenei taumafaiga sa taulamua ai mātua faaleagaga o le ekalesia ia Rev Oianatai Matale ma le faletua ia Faapaia Matale, o le peresetene o le aufaipese ia Seiuli Moaga Su‘a ma Leaupepe Vili, faapea le failutusi ia Imoasina Elu, o le teutupe ia Diane Nonu faatasi ai ma faatonu o le musika le susuga ia Seumanu Simon Matafai ma Talatonu Tuialii.
O le maualuga ma le matagofie o lenei faamoemoe ona ua mafai ona auai atu ai nisi o susuga i faafeagaiga ma o latou faletua o le faasinoti a Aukilani Matu.
O le susuga ia Seumanu Simon Matafai o loo faafesootai i ai le faatauina o lenei CD i le 0212423326.
