Ua faavaeina nei se ausiva fou, le Malu Measina Dance Group. O latou uma o tamaitai Samoa, ma o le itu e sili ai ona mataina lenei ausiva, ona o tamaitai uma o loo sisiva ai i le ausiva lenei, ua latou laeiina uma lava le measina a tamaitai o le atunuu – le MALU a le tamaitai Samoa (traditional Samoan Tattoo for women).
O le ala foi lea ua faaigoa ai le latou ausiva o le Malu Measina Dance Group, e faailoa atu ai lo latou faatāua ma nenee i le matagofie o le laei faaleaganuu ua latou laeiina i soo se taimi e faatino ai a latou faafiafiaga poo siva.
O le Malu Measina Samoan Dance Group e i lalo o le faamalu a le Pacific Events & Entertainment Trust. O se mitamitaga mo latou le faafiafia i soo se taimi a o faalauiloa atu ai i lea taimi le laei a le tamaitai Samoa, ma o se isi foi lea auala e ono faagaeetia ai ma faamalosiau nisi taimaitai Samoa, ina ia mitamita i lana aganuu, mitamita i ana measina, laei le Malu, o lou faasinomaga lea o oe o le tamaitai Samoa.
I se pepa o faamatalaga na tuuina mai, o loo ta‘ua ai se saunoaga a le tamaitai, o le sui foi lea o le Pacific Events & Entertainment Trustee, le afioga Ulalemamae Te‘evā Matāfai, “O le Malu Measina Samoan Dance Group o se uluai taulagalaga lenei mo tamaitai Samoa ina ia mitamita i lana aganuu e tauala atu i lana malu, lea ua tuese ai Samoa i le lalolagi atoa, ma ua moni ai lava le upu, o Samoa o le Penina o le Vasa Pasefika.”
O le Aso Toonai, aso 9 Aukuso 2014, ua faamoemoe o le a faalauiloa aloaia ai lenei ausiva, i le nofoaga o le Thirsty Whale (540 Mt Albert Road i Three Kings). O le a amata le polokalame i le 8pm i le afiafi, ma e $10 le ulufale pe a muamua totogi lau pepa ulufale a o lei oo i lea aso, ae $12 pe a faatoa totogi i le faitotoa i lea afiafi.
E iai nisi ‘aufaafiafia ua sauni e faafiafia ai i lena po, e pei o le Tatau Dance Group, CILLA, Miss World Samoa; Penina Maree Paeu, ma silasila ai loa le mamalu o le atunuu i nisi o uluai faafiafiaga a lenei ausiva fou, le Malu Measina Samoan Dance Group.
E mafai ona faamau sou avanoa mo lena aso pe maua foi nisi faamatalaga atili i lenei faamoemoe, pe a agai i le Imeli: malumeasina@gmail.com poo le latou Facebook.com/malumeasina, ma le telefoni feaveai: +64 21 648 637.
O tamaitai lalelei o le ausiva ma o latou alalafaga:
Grace Tinetali-Gafa (Taitai)
Alalafaga: Satapuala, Salelologa, Fasitoo-uta
Rita Adida Taupa‘ū
Alalafaga: Faleū & Salua Manono-tai, Vailoa Palauli & Gataivai
Tasileta Solialofi Atalani
Alalafaga: Sagone, Foailalo, Safotu, Taufusi Apia
Theresa Maree Tuilua
Alalafaga: Savaia Lefaga, Nofoalii, Siufaga Savaii
Amataga Edwina Ioka
Alalafaga: Afega, Fugalei, Tufuiopa, Vaitele-uta
Crystal Leataolela Mauga
Alalafaga: Leone Amerika Samoa, Tuanai, Vaiala, Saleimoa, Fasitootai, Falefa.
Fuatai Vera Fylda Sui Endemann
Alalafaga: Faleasiu, Avao, Fagamalo, Manase
Esmeralda Lo-Tam
Alalafaga: Sapunaoa Falealili, Tafitoala, Vailima, Alafua, Tulaele, Sapapalii
Ulalemamae Te‘evā Matāfai
Alalafaga: Sapulu, Salelologa, Saleaula
Faamatalaga na tuuina mai
