O le tuufaatasia ma faalauiloa atu o galuega mai faiva alofilima sa gapatia ai le sosaiete a le Tuaasinasina, o se tasi o ausiaga na matuā mitamita ai ma faafiafiaina le sosaiete a tamā ma tina matutua, auā sa faapine i ai le tele o a latou polokalame faagasolo o le tausaga.
Na tuufaatasia le Tuaasinasina ma le isi foi faapotopotoga a nai tuaa matutua, le “Auga o Aute” ina ia faalauiloa a latou meataulima, ma o se vaaiga mataina le tele le matagofie o mea eseese sa mamanuina ma gaoisia nei tuaa matutua. O ula felanulanuai, o ato lalaga, o iesoosoo ufimoega, tagaaluga, sikafu ma pulou mo le taumalulu, ma le anoanoai o meataulima mananaia.
O le mafutaga a le Tuaasinasina i Niu Sila, na amata lesitala aloaia i le tausaga e 2000 (Tuaā Sinasina o Samoa i Niusila Welfare Incorporated).
Ae o le aso 24 o Setema i le 2004 na see atu ai i lo latou nofoaga i Mt Roskill e pei ona faagasolo ai e oo mai le taimi nei a latou polokalame faataatitia.
O le susuga i le faafeagaiga, Late Leao Siitia ma le faletua ia Miliama Siitia, o laua lava na faavaeina mai lenei sosaiete, ma nisi sa latou auai faatasi i le amataga mai, ua lē o māua lelei i le taimi nei o latou suafa ma le aofai o i latou. I le taimi nei, e to‘a 25 sui lesitala aloaia o le sosaiete o loo iai, ae iai lava i latou e asiasi atu mai lea taimi i lea taimi ma auai i nisi o polokalame a le faalapotopotoga, le Tuaa Sinasina.
O lenei faalapotopotoga na faavae lava ona o le tagai i nai tuaa matutua, i latou ua loa le soifua. Na a‘e ai se tofa i le faafeagaiga ma le faletua, ma i latou na iai i le amataga, ina ia faatulaga se nofoaga e mafai ona latou agai i ai ma potopoto faatasi i nisi o taimi, e pei o so latou lava aiga, e ui o loo tofu lava le tagata ma lona aiga ua masani ai.
Sa tatala foi le avanoa, e mafai e soo se tina matua lava ma soo se tamā matua, pe nofomau i lenei atunuu poo se tuaa o loo asiasi mai, ae mafai lava ona agai ane i lena nofoaga e feoeoeai faatasi ai ma isi tuaa matutua, ma talatalanoa toe manatunatu ai i le soifuaga i le atunuu pele i Samoa, aemaise foi le manaia o le talatalanoa ai lava o latou i la latou gagana Samoa.
O le nofoaga e potopoto i ai, fai nai a latou taaloga faigofie e pei o le pele suipi, tominō ma isi lava taaloga faapena.
O nisi taimi ua alu ni a latou tafaoga i se isi vaipanoa, pe faatino foi nisi o latou meafai faaleaganuu, aemaise lava foi le talitaliē ia latou tala mālie; o se tasi o auala e maua ai pea e latou le fiafia i le soifuaga, pe a faifai mea faatasi ma isi o latou uso ma tuafāfine matutua.
E lua aso o le vaiso e potopoto faatasi ai, o le Aso Lulu ma le Aso Tofi, ma ua faatulaga foi a latou meafai in a aso e lua.
O le Aso Lulu, e amata lava le taeao i le latou lotu, sosoo ai ma le itula e tasi e fai ai sina latou faamalositino, e lē soona faamamafaina, ae tau lava ina fālōlō o latou aao; e fai ai foi sina siva Samoa e faagaioi ai le tino.
A mae‘a le faamalositiono, ona agai atu lea o tamaitai fomai e fai a latou siaki masani tau le soifua maloloina. O nisi foi taimi ua fai se lauga e faamalamalama atili ai nisi o mataupu tau se soifua maloloina.
Ona sosoo loa lea ma le taumafataga o le aoauli ma fai ni taaloga, e pei o le pele, ma isi taaloga faapena.
O Aso Tofi, e amata foi i se lotu ma se itula o ni faamalositino ua tau faamalosi teisi atu. Sosoo loa ma le taumafataga o le aoauli, ae faaiu ai i le faiga o latou meataulima, ma fai latou taaloga masani.
O nei mea uma e faia ma le fiafia ma maua ai lava le ‘ata i taimi uma.
E tuu lava i le faitalia o le toeaina latou ma le loomatua, i le vave ma le telegese e fetaui mo ia i le faatinoina uma o nei gaioigafai.
O le taimi nei, o loo avea le afioga ia Ulugia Nato ma taitaifono o le Tuaasinasina, ae sui taitaifono le afioga Tologataua Tauiliili, o ia foi o loo nafa ma feutagaiga a le sosaite ma le mamalu lautele o le atunuu.
O le faletua ia Nese Tauiliili o loo galue o le Failautusi, o le Teuoloa foi lea ma le Sooupu a le sosaiete.
