Ua tele lava ni auaunaga ua faaaogaina e le ofisa o aoga e faasalalauina atu ai fuafuaga faataatitia ma polokalame faaauau i totonu o Aotearoa nei, ona o le fia faamautuina pea ma faamautinoaina, o loo iai ni suiga e ala i le tulaga aoaoina o fanau Pasefika ma Maori i totonu o aoga mai lava i Aoga Amata seia oo atu lava i Iunivesite.
O le afiafi o le Aso Faraile, aso 11 Iulai na faalauiloaina ai e le minisita o aoga Hon. Hekia Parata i sana folasaga (presentation) lona fiafia e tusa ma faamaumauga ua faailoa mai ai le siitia pea o le tulaga ua iai le a‘eaina e fanau o le Pasefika ma Maori, o tomai ma agavaa e manaomia e le tamaitiiti e ala i le faaaogāina o alaga‘oa, o fua faatatau ma polokalame faaauau o loo faatinoina i totonu o aoga e tusa ma tofa mamao ma tofa manino faataatitia e pei ona faamauina ai fuafuaga a le PEP (Pasifika Education Plan).
O le faalauiloaina mai la o nisi o fuafuaga faataatitia e le susuga i le tamaitai minisita, ua maua atu ai ma le lagona fiafia ma le faagaeetia auā o lea ua faamanino mai e ala i faamaumauga nei, e mafai lava e nai a tatou fanau ona ausia tofa mamao pe a faatāua ma le loto atoatoa ma le faamaoni e tatou mātua aemaise lava o pulega i totonu o aoga ma le matafaioi a faiaoga auā le feagai ai o fanau ma aoaoga. E ui lava foi ina e lē o matuā atoatoa ona ausia e tamaiti uma ona o tulaga o le soifuaga ma faafatuatama‘i o le olaga sailiili ma le olaga tauivi o fanau ona o ni aafiaga i faafitauli ona o le soifuaga i totonu o le atunuu nei, ae o le mitamitaga o le vaaia ma le maitauina e tusa ma faamaumauga, ua siitia le ola taumafai o fanau.
O loo manino lava tofa mamao a le ofisa o aoga i totonu o le PEP ma e tāua tele le silafia e tagata uma aemaise lava o faiaoga mai lava i totonu o Aoga Amata e oo atu i Iunivesite, ina ia faatino ma le mautinoa ma le faamaoni auā lava le tomatauina o olaga aoaoina o fanau uma ina ia faaeaina ma faamanuiaina ai fanau mo le lumanai.
O loo iai le faamoemoe o le a faalauiloa atili faamaumauga maumaututu o le tulaga ua oo i ai taumafaiga a fanau ma mātua e ala i le unaia o fanau laiti i Aoga Amata aemaise o le faamalosia o fanau mai le 18 tausaga ina ia ausia manaoga o le agavaa faatulagaina a le NCEA. Ia e manaomia pea lava pea la tatou pitolaau (mātua) ina ia faamalosia pea ma lagolagoina atili fanau auā lava le unaia ia ausia matatia pei ona faananau ma manaomia mo i latou a o feagai ma aoaoga.
Sa mafai ona maua le avanoa e faaoo atu ai ni manatu ma ni mafaufauga o nisi o sui Samoa sa auai i lea folasaga peitai sa lagona foi le faanoanoa o le sui faasalalau auā e toaitiiti lava ni sui o le Pasefika sa auai atu e molimauina le folasaga a le tamaitai minisita i lea aso.
