O le matatia ua faatu e le Matagaluega a Malotau o le Ekalesia Katoliko i Samoa, o le faapaia o ni ulugalii se 23 i se sauniga e tasi, aemaise o nei ulugalii ua nonofo ma ua maua fanau, ae sa lei faapaiaina i le sauniga o le sakalameta o le faaipoipoga.
O se tasi o ulugalii ua 21 tausaga talu ona mafuta ma ua oo le matutua o le soifua i le ono sefulu ma ona tupu a o lea faatoa faaipoipo. O le molimau lea a le afioga i le Patele pule o le matagaluega le afioga Nikolao Fidow, ona o le galuega a se ituaiga o le ekalesia o ona sui o tina ma tamā matutua sa faia ai se latou tala‘iga ma faamalosi i ulugalii o le matagaluega ua nonofo ae lei faaipoipo ina ia talia le tino ma le toto o Iesu ae ua uma ona faapaiaina.
O le molimau a se tasi o sui o le Matagaluega, o se tamalii foi o le atunuu o loo avea ma faamasino o le Faamasinoga o Fanua ma Suafa le afioga Mulipola, na ia faailoa ai e faapea, o le toaluasefulu o ulugalii e mai afioaga o Faleu ma Salua i Manono, a o le isi toatolu e mai isi ekalesia o le Matagaluega a Malotau lea e amata mai i Mulifanua seia paia Manono ae o loo iai i totonu ekalesia Katoliko e lima.
Na faamatala foi e lea tamalii se lesona faaleagaga ua maua e ulugalii ua mae‘a faapaia ona o le taimi sa faia ai aoaoga sa fofola i ai e faifeau vaega uma o aoaoga a le ekalesia e tāua ai le faaipoipoga. “Na saunoa i ai Patele po ua latou silafia foliga o o latou taitoalua a o le tali ua leva na latou iloa”.
Peitai na faaalia e Mulipola ina ua faia se ata e Patele e faamanino ai le tāua o lea vaega. “Na fai i ai Patele ia o uma alii i le isi itu ae o tamatai i le isi itu, ona faatonu lea o tamaitai e taooto faō ae ufi atoa tino i ie”.
“Na fesili i ai le faifeau afai ua latou iloa lelei foliga o o latou taitoalua e tatau foi ona latou silafia alofivae o o latou taitoalua, ona faatonu lea e agai ane e tu le tagata lava ia i alofivae o lona lava toalua”. Na soisoi Mulipola ona o le vaega sili lea ona faigata auā e susue ese ie sa ufi ai tino o tina, e sese uma alofivae o loo tutū ai le itupa o alii. O se feau tāua lea ia i latou ona e tatau ona latou silafia uma vaega o o latou taitoalua ae lē na o foliga. O le feau faaleagaga ia tatau ona faamaoni i le feagaiga o le faaipoipoga ma ia tausisi i le tautoga ua osia.
O se tasi o feau ua momoli mai i le faia faatasi o nei faaipoipoga i le taimi e tasi, o le itiiti o se tupe e faaalu ai. Na faatino e le mafutaga a tina o le ekalesia i Malotau tapenaga i taumafa aemaise o le keke e tasi na aloaia ai le tuufaatasia o ulugalii e toaluasefulu tolu i le faaipoipoga tuuoti a le ekalesia.
Faaalia e le afioga Patele Nikolao e fasefulu ulugalii sa fuafua e faapaia peitai ua toe taatia isi ulugalii se‘i faia le latou faapaiaga poo le vaitaimi o le Kerisimasi. “O se feau tāua lenei mo isi foi ekalesia auā e mafai ona faia se sauniga faapenei e faapaia faatasi ai ni fanau a le Atua i le faaipoipoga ma fesoasoani ai i le faaitiitia o le mau mea e tapena ma tele ai seleni e faaalu ae o loo iai isi vaega tāua o aiga e tatau ona faaalu ai tupe e pei o le faaleleia o aoga a le fanau ma totonu o le lotoifale i le fatuaiga tausi,” o le finagalo lea o le afioga i Tamā Pule o le Matagaluega.
