I le mae‘a ai o le tausaga ma masina e ono sa valaauina ma galue faatala‘i ai i lana misiona i le aai o Hamilton i Niu Sila, na toe taliu mai ai le tamaitai o Fou Iosua Fiu i le faamuli atu a nai ona tuaa aemaise o le tapuaiga a si ona aiga, na feagai tonu ma lona aso soifua ma potopoto faatasi ai loa lana ekalesia ae tainane le paia o nai ona aiga uo ma aumea mamae, e patipatia ma faamanuia faatasi le aulia ai o lona 21 tausaga.
Na mua foi mea i Matautusa i le sauniga paia na taitaia e si ona tuaa le susuga ia Epikopo Iosua Fiu faatasi ma lagolago a le susuga i le sui epikopo Sini Frost ma le susuga ia Seiko Chu Sing.
O le molimau mo le soifua o Fou na saunoa i ai lo latou tuaa sinasina ia Leauta Fiu, ma tauaao ai ma le ki o lona aso tele, ona alo ai lea i le taumafataga tele felanulanuai na maau i ai le paia o aiga na lua, ma silamaimoa ai i faafiafiaga eseese na tapenaina e alo ma fanau a ona aiga, faapea siva mataina na saunia e lana autalavou, lufilufi ai lana keke ma faagasolo ai pea faafiafiaga ma saasaaga faa-Samoa i le musika malie a DJ JonnyBGood.
O le tamaitai ia Fou o le alo e faasino i le susuga ia Epikopo Iosua Fiu ma le faletua ia Agalelei Fiu, o le tele o faamanuiaga na saunoa ma molimoli e le mamalu o le valaaulia, o le agaga faafetai lava ona ua tau lau o le faamoemoe sa valaauina ai le afafine, lea ua sisila fofoga alofa o le Atua ma toe taitai mai o ia i le taupuai atu o aiga na lua ma lana ekalesia, aemaise nai ona mātua.
Na ta‘ape fiafia ma le faamanū Samoa na potopoto, ua alofagia e le Atua si o latou afafine ma lona soifua tautua. Malo le faatamasoalii ma le finafinau ia te oe le afafine, ia tumau pea lou faamuamua o le Atua ma lona finagalo.
Wellcome back n Happy Birthday! Love n Prayers from Mum n Dad, all your families and friends. Stay blessed!
