Faailoga le 40 tausaga o le ekalesia Katoliko Samoa Panmure

Aulotu Katoliko Panmure i le taimi o le taulaga o le Misasa
Aulotu Katoliko Panmure i le taimi o le taulaga o le Misasa

I le tausaga e 1978 na a’e ai se tofa i aiga e toatolu sa nonofo i Panmure e tatau ona amata se aulotu a tagata Samoa i totonu o le pitonuu o Panmure, ma o lea sa latou savalia ai loa le afioga ia Patele Nili, sa ia tausia le ekalesia Katoliko Samoa i na vaitaimi, mo se latou feiloaiga e faailo iai le lagona ua autasi ai aiga nei e toatolu, le susuga ia Nemaia ma Koreti Pua, Manupo ma Epi Valovalo,  faapea Sala ma Telesia Tanoai.

E tolu fesili na tuuina mai e Patele i nisi o le savali e manatunatu iai. 1. Pe aisea ua mananao ai e faatu se aulotu Samoa i Panmure? 2. Pe tou te lē mananao e faatasi atu i le aulotu i Tamaki lea ua faaigoaina ia Glen Innes? 3. Ua mautu outou manatu e faatu se aulotu ne’i te’i ua sui o outou manatu i se taimi o i luma?

Na tali le savali a aiga nei e tolu ia Patele, o le latou vaai mamao ia aogā mo a matou fanau o loo ola a’e i Niu Sila, ia iai se aulotu mo matou aiga e asiasi mai i Samoa aemaise o matou aiga ma tagata Samoa o loo gasolo mai ma nonofo i lenei pitonuu o Panmure.

Afioga ia Sala Tanoai ma le faletua ia Telesia toe Ulutaia o le galuega  o loo totoe nei
Afioga ia Sala Tanoai ma le faletua ia Telesia toe Ulutaia o le galuega o loo totoe nei

Sa savalia e le ofisa o le aulotu Samoa i Glen Innes ia matafale nei, ae latou te lei taliaina, ona o le manaoga tele lava ia faatuina se aulotu a Panmure lava latou, ma amata se autalavou i lalo o le faamalu a le Ekalesia Katoliko a Panmure.

E pei ona latou faailoa, ua matou ioe atoatoa e mafai ona matou amataina se ekalesia Samoa i Panmure, ona o matou o ni tagata sa ola mai i totonu o le lotu ma ua mautu o matou faatuatuaga  Katoliko.

Sa fautuaina e Patele Nili le galuega e muamua faataunuu e nei aiga ae lei amataina le lotu, ia outou o atu ma saili mai nisi aiga e fesoasoani i le galuega ona e lē mafai ona amataina se lotu i ni aiga se toatolu.

I lea taimi sa latou savalia loa nisi o aiga ma maua ai le susuga ia Folasa ma Talaluma Setefano, o le tamaitai ia Sala Tanoai, faapea foi Sola ma Tina. E lima aiga ua maua ma ua amata ai loa le galuega i Panmure e ala lea i le taulaga o le Misasa muamua na osia e le afioga ia Patele Uto auā sa galulue faatasi ma Patele Nili i le tausiga o ekalesia Samoa i Aukilani.

O uluai tofi i totonu o le ekalesia na tulai mai ai loa Folasa Setefano i le tofi Peresitene, Sui peresitene o Sala Tanoai, failautusi o Manupo Valovalo ma le teutupe o Koreti Pua. Ina ua mae’a ona filifilia tofi ona saili loa lea o le ekalesia poo ai se Sagato e sulufa’i iai le ekalesia. Peitai na faailoa le finagalo o le afioga ia Patele, e lelei ona sulufai ia Sagato Mareko e leai se aulotu o sulufai iai, ona avea loa lea o Sagato Mareko ma sulufaga a le aulotu i Panmure seia oo mai lava i le taimi nei.

Taimi o le taulaga o le Misasa
Taimi o le taulaga o le Misasa

Ua tupu ma ola le galuega, ma ua tele foi ina faaulu atu matafale a tagata i le fia galulue ona ua tele polokalame ua aogā ai fanau, e pei o le autalavou, Aoga Aso Sa, faatasi ai ma taaloga. Ua faavaeina foi le mafutaga a tina e fesoasoani i mea e fai a le ekalesia.

Toatele nisi o tama fanau o le ekalesia ua maua tofiga i le ekalesia aoao, aemaise ai ua iai ni lupe faalele a le ekalesia mo le galuega a le Atua. I le taimi nei ua toe tasi le aiga lotu sa faavaeina mai le ekalesia o loo totoe o le susuga ia Sala Tanoai ma le tina ia Telesia ma le fanau.

O le taeao o le Aso Toonai na toe feiloai uma ai aiga lotu o le ekalesia Katoliko i Panmure, o i latou ua aumau i Ausetalia ma Tutuila ae sa mafai ona toe malaga mai e patipatia faatasi le alofa o le Atua i totonu o lana galuega ina ua atoa le 40 tausaga talu ona faavae mai. O le afioga ia Patele Nili ua malolo ae sa toe aumai e le ekalesia i Panmure e ta’ita’iina le sauniga o le Misasa ona o ia sa faavaeina mai le ekalesia faatasi ai ma le galulue faatasi a nisi o faifeau e aofia ai Patele Felise Lemi, Patele Andrew faapea faifeau o le Palisi i Panmure, ma Patele Leaupepe Timu.

Ua militino lagona o le fiafia auā o lupe sa vao eseese ae ua toe fuifui faatasi i le alofa o le Atua. Na mae’a le sauniga ona faaauau lea o le mafutaga i se taumafataga tele sa fai i le hall a le ekalesia i Panmure, lea sa tatala i le ‘ava o le feiloaiga na saunia e le autalvou, ma faasolo ai loa polokalame o le aso. O matafale o le aulotu o loo iai ile taimi nei:

Mulipola Filipo ma Pepa Timo

Tanoai Milo ma Lepeka Tanoai

Ioane ma Taofi

Sala ma Telesia Tanoai

Mulipola ma Peaua Palaaia

Sala Vena

Otila Leota

Muliagatele Sausoo ma Lele

Muliagatele Silao ma Sharon Niu Kapeli

Tanoai Reupena ma Kisa Tanoai

Faumui Viti ma Joanne Autagavaia