O loo faagasolo nei i Otahuhu i Aukilani i Saute se ta ga tatau a le afioga ia Su‘a Suluape Paul Junior ma lana autufuga faatasi ai ma le tapuaiga a le meanaitaua le faletua ia Sia Su‘a i le Pacific Business Trust i Papatoetoe.
O lea galuega na amata mai i le aso 7 o Seteme ae faamae‘aina i le aso 26 o le masina nei lava. E to‘a 13 i latou o loo taooto ai, e to‘a 8 alii ae 5 tamaitai. O loo faagasolo nei le taina o pea a alii i le vaiaso ua mavae ma le vaiaso nei ae o le vaiaso fou o le a taooto ai loa tamaitai mo a latou malu.
O le alo e faasino i le afioga ia Su‘a Suluape Alaivaa le afioga ia Su‘a Suluape Paul Junior ma le falelua o le aiga Salemalama o loo faatautaia lea faamoemoe, ae o le afiafi o le Aso Sa o le a malaga mai ai le afioga ia Su‘a Suluape Alaivaa mo ni ana polokalame faasemina poo ni aoaoga se tolu mo le faamoemoe lava lea o le faalauiloa i alo ma fanau na fananau i Niu Sila nei le tāua ma le uiga o le tatau.
E lē o se tatau e inupia ma fia malosi solo ai, ae o le tatau e iloa ai ona tautala i mea e fai i totonu o aiga e pei o le folafolaina o sua ma faaaloaloga ma ia e iloa ai foi lau tu ma lau aganuu. E amata le taaga i le taeao ae mae‘a i le po, ua iai foi taimi faatulagaina a le tagata e taoto ai.
Ma ua maitauina ai i nei vaiaso e lua talu ona faagasolo le galuega, le toatele o le mamalu o le atunuu o loo gasolo atu e tapuaia le galuega a le agaiotupu ma le falelua o le aiga Salemalama, aemaise ai o aoga o loo agai atu e fia malamalama ma iloa le faatinoina o le taina o le tatau, ae ua silafia ai foi e le tele o fanau aoga le mafuaaga o le upu, “E lē sili le ta‘i nai lo le tapuai” i le tumutumu o aiga ma mātua i aso taitasi.
Sa faapea foi ona malaga mamao mai nisi o alo ma fanau mai Melepone e asia le galuega, o nisi o fanau sa taina a latou tatau i le afioga ia Su‘a i Samoa. O loo taina ai foi le tatau o le pule a le kamupani malosi o le BlueSky le afioga ia Toleafoa Tiafau Douglas Creevey ma se tasi o alo o le atunuu sa iloga i le All Blacks le alii o Eroni Clarke.
O nisi o alo o le atunuu le afioga ia Apulu Mary Kalala Autagavaia ma Tanoai Reupena Michael Tanoai, ua la faavaeina se Trust ua faaigoaina o le Epiphany Pacific Trust poo le Aganuu Faasamoa One O One, poo se vasega faavae, faatasi ai ma le faamalumaluga a le afioga ia Patele Iosefo Timu.
O nisi o manulauti o lenei faalapotopotoga o le faalauiloa ma faatāua le tofi mai le Atua o le tatou Aganuu, ma o loo faatino faatasi ma le tala‘iina o le finagalo o le Atua.
O le sini ma le faamoemoe maualuga o nei polokalame faaleaganuu o le lalaga ma faamanatu i alo ma fanau sa soifua ma fananau i Niu Sila nei.
E 500 i latou ua mafai ona auai i lenei aoaoga, ma o loo fai solo i totonu o ekalesia, komiuniti halls faapea foi le nofoaga ua faamautu i ai lenei faalapotopotoga le Pacific Business Trust i Papatoetoe.
O loo aoaoina le folafolaina o meaai, o sua, faatasi ai ma tu ma aga faapea ma le loto Samoa, auā a malamalama tamaiti i mea faa-Samoa o loo faatinoina o le a mafai ai foi ona auai i soo se mea poo se faalavelave faa-Samoa.
A aluaialuai nei aoaoga ua mananao loa tamaiti e fia ta ni a latou tatau, ma ua lagona ai loa e le Afioga ia Apulu Mary Kalala ma Tanoai Reupena ua tatau ona faatinoina lea vaega, lea ua mafua ai loa ona faagasolo le taina o tatau.
Ta‘ua e Apulu e 13 i latou o loo taooto nei ae to‘a 12 foi i latou o loo faatali, ma e fuafua lava i le malosi o le agaiotupu ma le falelua o le aiga Salemalama, o le a mafai ai ona faaauauina le galuega mo nisi nei fanau aoga.
