O le laoa o Pese i Falefata i Salelavalu sa faataunuuina ai saofai poo le faafotu o le vaa‘ulu i le Suafa Pese, i le Aso Toonai, 23 o Ianuari i le 7 i le taeao.
O lea faamoemoe ina ua tasi moemoe i ai le tofa ma le uta i lē o loo tausia le Aiga le Tofa Pese Vaea faapea ma se maliliega na autasi i ai finagalo ma faamoemoe a le Aiga potopoto ma faataunuuina ai loa i lea aso e pei ona atofaina.
O le tasi itu tāua e pei ona ta‘ua e le Tofa Pese Vaea o loo tausia le Aiga, ua leva ma autausagā e lei toe iai ni nofo sa faia, na gata lava i le taimi sa fai ai a matou nofo mai le tausaga e 1997 seia oo mai i le taimi nei, a o se itu tāua lea ua faataunuuina ina ia fesoasoani i le tausiga o le aiga aemaise ina ia māmā le avega e ala i le taupulega o mea e fai.
O se faamoemoe sa mataina ma faatumulia lea aso, o le Susuga i le Faafeagaiga o le Ekalesia Metotisi i Salelavalu le Susuga ia Sagone Leilua sa fai ma ositaulaga o le faafotu i le aso.
Na sosoo ma le aliitaeao ma le usu faaaloalo a le nuu ma le Afioaga, Itumalo faapea ma Malo usu sa molimauina le faafotu o le vaa‘ulu ia poo le Sao i Matau o le Suafa Pese i lea taeao. Ua lē gata i le Afioaga, Itumalo ma Malo usu, a o Aiga Uo ma ē Masani sa tumutumu i lea aso e molimauina le faamoemoe o le aiga.
O le faamoemoe laualuga, faafetai ua pale mai Suafa nei o le Aiga ina ia faafaigofie ai le taupulega ma fesoasoani malosi e ala i soo se mea e tupu i totonu o le matou aiga i Falefata.
Oi latou uma ua faasuafaina ma pale mai o nisi e alala ma aumau i atunuu mamao, o nisi o Upolu ma Savaii i le motu tele i Salafai. Na faaiuina lea aso i le manuia aemaise o lagona o le faagaeetia ma le fiafia ina ua tau manū le faamoemoe e aunoa ma ni faafitauli.
O i latou ua pale mai ma faasuafaina i le Suafa Pese i Salelavalu: Pese Foe Pese; Pese Siaopo Pese; Pese Koleni Tuigamala; Pese Faataala Faleu; Pese Kiona Faleu; Pese Miliama Baker; Pese Ula Baker; Pese Tauvela Pese; Pese Muta Leatioo; Pese Luapule Enosa; Pese Eli Pese; Pese Palemene; Pese Sianini Koleni; Pese Misilei Tuigamala; ma Pese Kolone.
O faamatalaga na tuuina mai
