O le soifua tautua ma le aogā o tina i totonu o aiga, nuu ma ekalesia, e lē mafai ona faatusalia sona totogi ma sona tau, e oo foi i ni meaalofa ua na o ni faailoga vaaia o le agaga faafetai, auā o tina e maopoopo ma mafolafola ai aiga uma.
Ae o le agaga faafetai ma le faaeaea a se tasi o toa tautaua o le musika le susuga ia Willie Tavita, na a‘e ai se finagalo e faafiafia mo le paia ma le mamalu o Samoa i le aai o Melepone aemiase lava o le faapitoa mo tina uma o nopiai i le aai.
O le Aso Faraile la o le vaiaso na tuanai atu ae Aso Sa ai le aso faapitoa mo tina, na faatino ai le faamoemoe e pei ona faimeaalofa ai Willie Tavita ma nai ona alo masaga ua faaigoaina o le ‘Tavita Trio’, i tina uma e ala i la latou koneseti sa faia i le pitonuu o Hampton Park.
O le auga o aute o le po e toe faatāuaina ai mafutaga a aiga i le va o mātua ma a latou fanau, e pei ona avea ai lana pese o le “tina leai se totogi” ma autu poo le theme o le koneseti.
Na maitauina le tele o tuaa sinasina ma tina matutua na tutulu ona o le matagofie o le faatinoina o le pese lea e se tasi o tina matua o le atunuu ma lona alo tama na valaauina faapitoa e Willie e fesoasoani mo taga o le pese.
O le faamoemoe lenei o le susuga ia Willie Tavita o se faamoemoe ese i Melepone ona o le uluai taimi lea ua faia ai se koneseti e lē faatagaina ai le ava malosi ae ua tatala le avanoa mo aiga uma mai lava i alo ma fanauiti e tafafao ai ma faamanuia faatasi le Aso o tina.
O le uluai taimi foi lea o le susuga ia Willie ua faafiafia ai i le aai, ma o loo iai le faamoemoe o le Aso Toonai nei, aso 16 Me, e toe sosoo ai le fau ma le fau i la latou faafiafiaga lona lua i le pitonuu o Sunshine o le a faapitoa ai mo le au eva ma le au tafafao e fai ai o latou vae i pesega mālie ma le matagofie a le ‘Tavita Trio’.
Na momoli le agaga faafetai o le mamalu lasilasi i tupu ma e‘e, faletua ma tausi ma Samoa na potopoto i le susuga a Willie ona e lē gata ua toe faafofoga le toatele i pese ma fatuga na soifua a‘e lava o pepese ai, ae o lea faatoa feiloai ma lulu aao ma fesilafai ma lenei tamalii iloga o le atunuu.
Lagona foi le meemee o Melepone ona na o le pau ia o faafiafiaga i Ausetalia mo lenei vaitau. O le fetalaiga ia Tuuu Kenape Faletoese na fai ma fofoga o le po, o i laua foi ma si ona tausi ia Laine na autu i ai tapenaga o le faamoemoe i Melepone. Ua faamalo le fogafoga, ua malie mata i vaai.
