O le faafetai lava na agai i ai saunoaga a le Malo o Samoa atoa ai le afioaga o Ga‘utavai i Savaii i le sauniga e tatala aloaia ai le galuega lona fā ua faatupe e le Malo o Saina talu mai le tausaga na tea nei. O le afioaga la o Ga‘utavai le isi afioaga ua maua le fesoasoani lenei a lea Malo ma e ‘afa miliona tala le tau atoa o le galuega ($500,000 tala Samoa).
“E momoli atu le faafetai tele i le Amepasa o le malo ma tagatānuu o Saina, Li Yan Duan. Faafetai mo le fesoasoani mai i atinae a Samoa e ala i le itu tau aoaoga. Momoli atu le faafetai tele i le malo ma tagatānuu o Saina mo le agalelei. Talitonu o le a faaauau ai pea le tatou va galulue faatasi ai. Ua avea lenei faleaoga ma galuega lelei ua faia mo aoga i totonu o Savaii ma ia tumau ai pea le lelei ma le umi ona faaaogā o lenei faleaoga, i lalo o le vaavaaiga a le Komiti o le Aoga i totonu o le afioaga,” o le saunoaga lea a le alii Sui palemia, le Afioga Fonotoe Pierre Lauofo na fai ma sui o le Malo o Samoa e momoli le faafetai ia Saina atoa ai isi atunuu ua faapea ona tuu mai o latou tau‘au i atinae i Samoa e pei o faleaoga e pei ona iai malo o Iapani, Niu Sila, Ausetalia, o le Faalapotopotoga o Malo Aufaatasi faapea le Iuni a Europa.
O faiga faapaaga ua mafai ona faatautaia ma le Malo o Samoa e pei ona saunoa le alii Sui palemia ua mafai ai ona vaaia nei galuega tetele.
Ua aofia ai potu aoga, o le potu faapitoa o le aoaoina o le tomai faa-computer ua mae‘a ona faatotoga uma i masini computers ma le ea malulu. E lē gata i lea o le potu mo faiaoga ma le potu fono mo le komiti a le aoga ma faiaoga faapea ai mātua. E maoae le tetele o nei faleaoga ma na foai atu foi piano ma isi meafaigaluega ma ato aoga mo le fanau i Ga‘utavai.
Faaalia e le Pule o le Aoga na fai lava si faaletonu o le faleaoga sa iai ma e tutulu lava i taimi o aoga. O lea na talosagaina ai loa le fesoasoani a le Malo ma ui atu ai i le Malo tele o Saina mo lenei galuega. O lea la ua mae‘a le faleaoga ma o le fautuaga masani ua ofo atu i fanau ma mātua – ave le fanau i le a‘a ma ia faamaoni faiaoga i le faatinoga o o latou tiute o le aoao atu i le fanau.
Faaalia e le afioga Fonotoe, o le unai lava a le Malo ia nonofo fanau i o latou nuu ma itumalo e faatino ai lenei vaega tāua o le soifua atiae o le ola aoaoina nai lo le agai atu i le talafatai o Apia lea ua masani ai e tau saili aoga e faaaooga ai le fanau. O le mafuaaga lea o le manatu o le ā lava le ituaiga faleaoga ua fau i Upolu o le lelei fo’i lena e tatau ona oo iai faleaoga ua fausia i totonu o le motu tele i Salafai.
