Ua faafetaia e le Matagaluega o Faamasinoga le tautua a se tasi o tamalii ua see ese nei mai i le tofi Ofisa Sili o lea ofisa tele a le Malo. O le sauniga faapitoa e tatala aloaia ai galuega o lenei tausaga fou a le Matagaluega o Faamasinoga, na faapea ona agiga ai ma le faafetai a le Afioga i le Faamasino Sili, Patu Tiavaasue Falefatu Sapolu, i le fetalaiga Masinaalupe Tusipa Masinaalupe i le matagaluega.
O ia foi na ta‘ua e le afioga i le Faamasino Sili, na amatamea lava i sauniga lotu ia ua faia faaletausaga i lenei vaitaimi, e talosia ai galuega a le Matagaluega i lea tausaga ma lea tausaga.
O le susuga i le faafeagaiga o le EFKS Magiagi, le susuga Rev. Tuanai Uesele na taitaia lea sauniga i le faamanatu i Faamasino ma Loia ma sui uma o le Matagaluega, e manatua o le faamasino sili lava o le Tamā o i le Lagi, o lana pule faasoasoa lea ua mafua ai le faaolataga ua sapi ai Samoa. O le galuega faafaamasino na ia faamanatu, ua matuā faamuamua ai le faamaoni ma le alofa.
O le afioga lava i le Faamasino Sili ia Patu Tiavaasue na saunoa faamalosi i le vasega o faamasino, loia ma sui uma o le ofisa o faamasinoga auā le alo atu i se isi foi tausaga tumu i galuega ma na ia faafetaia ai loa le tautua ua mae‘a a Masinaalupe Tusipa ae faafeiloai atu i le susuga Papalii John Taimalelagi lea ua tulai mai i le foe o le faauluuluga o le matagaluega lenei ma ona ofisa i Mulinuu faapea ai ma Tuasivi i Savaii.
O Masinaalupe o se tasi o Ofisa Sili umi lana tautua i le tofiga lea mo le Matagaluega o Faamasinoga. O lana auaunaga na amata mai lava i le tau faaiuiuga o le vaitau e 1990 ma na amata mai i le Matagaluega o se faaliliuupu, lesitala seia oo lava ina ia faauluulu i ai le matagaluega.
O lana faamatalaga ina ua mae‘a le tofiga o le faafetai o tausaga e tele na tautua ai i le atunuu aemaise o le manatu e ave lenei avanoa i nisi o loo fai a‘e foi taumafaiga i totonu o le matagaluega.
Sa iai se taimi na faamalolo talu ai nei le tofa Masinaalupe ona o ni tuua‘iga ma suesueina faasaga ia te ia ma se isi foi ofisa sili o se isi matagaluega a le Malo peitai na mae‘a ia suesuega ae toe foi Masinaalupe i lona tofi lenei ae o le isi ofisa sili e oo mai i le taimi lenei e lei iai lava se faamatalaga pe toe faafoi ane i lona tofiga pe leai.
O le alii ua sui tulaga ia Masinaalupe o se tasi sa galue o se ofisa Sili Lagolago o le matagaluega i lalo o le vaavaaiga a Masinaalupe ma na feagai ma le vaega o Faamasinoga o Fanua ma Suafa.
