Na taunuu mai i le Aso Lua i Samoa se aumalaga toatele e tusa ma le to‘a 40 o alii ma tamaitai ua o latou faia le galuega o le faatosina o tagata tafafao maimoa mai i o latou atunuu e malaga mai ma asiasi mai i Samoa. O tagata nei e i totonu o se polokalame ua faaigoaina o le Fefaasoaai i le atinae o tagata tafafao mai a Samoa lea ua silia i le 10 tausaga o faatino ina ia saga unai ai le faailoa atu o Samoa i atunuu mamao (Samoa Tourism Exchange).
O le tausaga lenei ua ave ai le faamuamua a le Pulega o tagata tafafao maimoa mai i fafo i Ofia faasalalau ma tagata o loo feagai ma le faatosina poo le maketi ai o Samoa i atunuu i fafo. Ua valaaulia ai e agai mai i Samoa ma ia faatatalanoa sui lesitala o atinae tau tagata tafafao mai i nisi auala e mafai ona saga faalauiloa ai Samoa. Faaalia e le Sui palemia, le Afioga Fonotoe Pierre Lauofo i le tatalaga o lenei faasoa o tagata tafafao, e moni o laufanua o Samoa ma lona siosiomaga, o ona matafaga ma le laufofoga fiafia o ona tagata, o le talimalo lelei ma le tele o aganuu e fia iloa e tagata mai fafo, o ni itu ia ua agai pea i ai le faalauiloa a Samoa.
Ae o tulaga foi nei o loo faalauiloa ai isi atunuu o le Pasefika ma e mae‘a ane ua tali tutusa lava faalauiloa, ae o le mafiuaaga lea o le unai o le feiloaiga i lenei tausaga ma tagata o ofisa faasalalau, ina ia saili nisi auala e ese mai ai Samoa mai i ona tuaoi i le Pasefika ona unai loa lea o faasalalauga i atunuu mamao. Na foi mai le Alii Palemia i lana siigama‘i mai i Niu Sila ma tapunia lenei faamoemoe i le faaiuga o le vaiaso ma na ia faafetaia ai i latou uma na mafai ona malaga mai mo lenei galuega auā o le manatu e lē o lava lava le faalauiloa i fafo o Samoa nei ma auala e mafai ona saga faatosina mai ai tagata tafafao maimoa mai i fafo.
O le faamatalaga a le Alii Palemia – o le malosi o le va galulue ai o paaga nei a le Pulega mai i itu uma o le lalolagi o le a vaaia le fua mai i le lumanai e ala i auala o le a o latou saga faalauiloa ai Samoa. Sa iai foi ma alo lauiloa o Samoa i le taaloga o le lakapi Amerika le NFL ona na malaga asiasi mai foi mo se polokalame e unai ai le soifua maloloina i fanau aoga a le atunuu.
Ta‘ua e le Alii Palemia o le tasi lava lenei o auala ua saga faalauiloa atu ai Samoa i atunuu mamao, ua faaauala i ana fanau ua lauiloa i taaloga faavaomalo ma o le taumafaiga o polokalame a Paul Soli‘ai o le Falcons ma le alii o Isaako A‘aitui o le Miami Dolphins, ua o la faalauiloa atu ai lava ma Samoa i nei polokalame ua faatino i aoga i Amerika. O le afiafi na faaiu ai lea mafutaga na faapea ona tufatufa ai ni meaalofa o ni tanoa mo faailoga faapitoa a sui uma mai i itulagi eseese o le lalolagi ma faafetaia ai lo latou sao i le faalauiloaina o Samoa.
O atunuu sa iai ona sui i lenei faasoa o tagata tafafao maimoa mai i fafo e aofia ai Niu Sila, Ausetalia, Amerika, Saina ma Korea i Saute, Kanata, Peretania ma isi atunuu o Europa faapea ai ma Amerika Samoa.
