Ole masina o Iuni ile tausaga nei na asiasi ai le faili ale Young Lovers i lona taimi muamua i laufanua o Melepone faatasi ai ma le pulega ale fale faafiafia ole Club Royal e faailoa le taleni o musika i lea foi itu ole kelope. Ae ose avanoa ua feiloai atu ai i nisi o tamafanau o Samoa oloo alala ma aumau i Melepone le susuga ia Irama Mariner ma le faili ale Tama ole Niu Band oloo faafiafiaina foi le mamalu ole atunuu i totonu o Ausetalia.
Ile malaga atu ai ole faili ale Young Lovers le susuga ia Tofa Agalava Tavana ma le faili, na amata ai loa le faigauo poo le faigapaaga a nei faili e lua i va o atunuu nei e lua. E ui ile puupuu ole taimi ma le tasi ole vaiaso na malaga ai le faili lenei mai Aukilani i totonu o Melepone ae na faaalia le agaga fiafia tele ole susuga ia Irama Mariner ole taitai ole faili ale Tama ole Niu i lenei mafutaga, ona ua mafai ona faafesoaa’i ai taleni ma meaalofa ale Atua ua tuuina io latou tagata.
Ae le gata i lea ua suia ai foi le faafofoga ma le evaeva a o tatou tagata Samoa oloo aumau i totonu o Melepone. Pau le eseese laititi o atunuu e lua oloo faatino ai taleni a alo ma fanau ole atunuu, ona o Niu Sila nei, ua mautu lava fale poo nofoaga oloo tata ma faatino ai faafiafiaga, e pei ona iai le fale ole susuga ia Ben Pele ma lona faletua ia Fano Pele le Club Royal, ae o Melepone oloo faatinoina faafiafiaga i totonu o hall, ma e fuafua lava ile hall e avanoa ise faafiafiaga.
Ole mafana ole mafutaga faaleuo ma faaleuso o alo o Samoa ua talenia i musika, ua mafua ai ona malaga mai le faili lenei o Tama ole Niu Band i laufanua o Aukilani i lona taimi muamua e pei ona talimalo ai le faili ale Young Lovers ma le fale faafiafia ale Club Royals.
E toaono le aufaili na malaga mai, e aofia ai le susuga ia Irama Mariner mai Safatoa Lefaga, Feata Augafaapae mai Safatoa Lefaga, Lalomanu ma Saleimoa, Ioapo Tiai mai Sataoa, Lepea ma Fagaloa, Victoria Vaitimu o Fasitootai ma Afega, Lokeni Tunumafono o Lotofaga ma Sataoa, ma Raymond Time o Puipaa Toamua.
Ole po ole Aso Faraile 15 o Setema ma le po ole Aso Toonai 16 o Setema sa faafiafia ai le faili lenei ale Tama ole Niu ile fale faafiafia ole Club Royals, ma sa maitauina ai le toatele o tamafanau ole itumalo o Lefaga aemaise o uo ma paaga sa lagolagoina le malaga mai ole faili mai Melepone ae le gata i lea o tina ma tamā matutua oloo iai a latou tamafanau i lenei faili sa faatasi atu e opogi le faamoemoe o fanau.
Ile saunoaga ale susuga ile taitai faili mai Melepone ia Irama Mariner, ole faamoemoe maualuga lava o lenei malaga ole avanoa maua gata le avanoa ua maua nei mo faili e lua e fetufaa’i ai le poto ma le malamalama i tulaga o musika, ma ole fiafiaga sili lea ia te ia ma le aumalaga ona ua ese foi le suiga ole malaga mai i Aukilani.
Ma ua iai le famoemoe ma le lagona i taitai o faili e lua faapea le susuga ia Ben Pele ole pulega ale fale faafiafia ole Club Royals, ole a aveavea’i ai pea ma faaauauina lea mafutaga soosoo tau’au a faili e lua, auā o lea ua toe tapena le isi malaga atu i Ausetalia ale faili ale Young Lovers ma le pulega ole fale kalapu ile faaiuga ole tausaga.
