Ua toe o ni masina ona agai loa lea o le atunuu e faatino le faigapalota tele ma ua tele foi ina vaaia galuega ua agai i ai sui tauva mo le lesitala o tagata palota aemaise o le faatosina ai o sui ina ia agai atu i lea Itumalo ma lea Itumalo mo le latou palota.
O loo faagasolo lava foi teuteuga o le tulafono ua finauina pea i luma o le Palemene ae o le unai aupito sili ona tele i le taimi lenei o le taumafai lea ina ia toatele tamaitai i totonu o le Palemene e pei ona pasia ai le faamalosia o le faaopoopo o le numera o tamaitai i totonu o le Palemene i le isi faiga filifiliga lea.
O le faaiuga o le vaiaso na faapea ona agai ai le faamalu o faalapotopotoga tumaoti e galulue faatasi ma le lala o le faalapotopotoga o tamaitai o Malo Aufaatasi i Samoa nei e faatino ni aoaoga mo sui o faalapotopotoga tumaoti aemaise o tamaitai ina ia manino i le tāua o le malamalama i suiga o faigapalota ua iai nei i le avea ma tagata palota poo le avea foi ma sui tauva.
O le aoaoga ua agai ai foi i le fesootaiga tāua ina ia malamalama tamaitai i le tāua o lo latou sao i totonu o le fono faitulafono. O lea e toatolu tamaitai o loo avea ma sui faipule i le taimi lenei pe a fuafua i le to‘a 49 o sui faipule uma o le Palemene. O le lua tausaga talu ai i le 2013 lea na pasia ai le tatau ona oo atu i le 10 pasene o le numera o faipule o le Palemene o Samoa o tamaitai ma a mae‘a le faiga filifiliga ia Mati o le tausaga fou e lei maua lea maualuga tusa lea ma le toalima o tamaitai faipule, ona faamalosia loa lea o le tulafono ua pasia ina ia ave lava nofoa e lima i tamaitai. Afai e sao nisi e sili atu lea numera i le tausaga fou ona lē tau manaomia lea ona faaaogāina lea tulafono fou.
Ua laga le tele o suafa o tamaitai o le a tauva i le tausaga fou ma o le aoaoga lenei na faatautaia i le vaiaso na tea nei na oo atu ai foi ma sui o le ofisa o faigapalota e saga faamalamalama i sui faaolioli atoa ai ma sui tauva le tāua o nei suiga, ae o ā teuteuga o le tulafono ina ia aua ne‘i faaletonu ai se sauniuniga a se tamaitai ua agai e ofi atu i lenei faiga filifiliga.
O le aoaoga lea e tolu aso na faagasolo ai ma na ta‘ua e sui o le SUNGO o le tasi lenei o le tele o ana taumafaiga ina ia unai lenei taumafaiga ia lē gata foi la i tamaitai palota ma sui tauva ae faapea i alii ina ia manino i galuega e tatau ona faatino auā le sauniuni atu ai i faiga filifiliga a le atunuu i le tausaga fou.
