O le saoasaoa tele o le lafoai otaota o tagata Samoa – ua faamauina i faamaumauga a le ofisa o le siosiomaga o le Pasefika, le SPREP, e pei ona ta‘ua e le alii faufautua i le pulea lelei o otaota lafoai, o Dr Frank Griffin, o le nofoaga mo le otaota lafoai i Tafaigata sa iai le fuafuaga faapea e 12 tausaga e tatau ona mae‘a ua tumu uma le vaega muamua o lea lapisi ae e uma le uluai ono tausaga o lea fuafuaga ua faatumulia le lapisi i Tafaigata. O le mafuaaga o le matuā tele o le otaota ua lafoai.
O le sauniuniga o le fono tele a malo laiti tau atia‘e o le lalolagi, le SIDS lea e fai mai i Samoa nei i le faaiuga o le masina ma le amataga o le masina fou sa alu ai se asiasiga a le Matagaluega o Punaoa Faanatura ma le Siosiomaga ma le SPREP ma o iina na maua ai le tele o le otaota lafoai, e fai o taumafa ae faapea foi i pepa paepae solo, o laau e sala i lalo i taimi e teu ai faletalimalo ma o latou siosiomaga.
O lea la ua tufa kalone lapisi i faletalimalo uma i totonu o le talafatai o le taulaga ina ia mautinoa e vaevae ese ai le otaota o toe‘aiga o taumafataga ma le isi kalone e agai i ai otaota e pei o pepa o apa ma kalone mo lau laau, o lālā o laau ma fua o laau o loo faapea ona aoina i lea vaiaso ma lea vaiaso.
Ua auai atu ai foi ma le Faalapotopotoga o Tamaitai faipisinisi ina ia mautinoa latou te aoina mai le otaota e mafai ona faapala auā le faalelei eleele faalenatura tele e maua mai i nei otaota lafoai mo le tele o a latou atina‘e tau faatoaga ma ua galulue faatasi nei ma le Siosiomaga a Samoa faapea le Siosiomaga a le Pasefika ina ia mautinoa le aoina o lenei otaota, vaevae lelei ma ave ai le otaota e tatau ona lafoai i Tafaigata ma le otaota e mafai ona vavae ese mo le faalapotopotoga lenei o le Women in Business.
E 23 lelei faletalimalo o le a ao mai ai lenei otaota. Faaalia e nisi o lenei polokalame ua tatau foi ona agai le atunuu ina ia vaai i le vaevaega o otaota lafoai i le taulaga aemaise le vaitau o le a‘e o aoga e matuā tele le otaota o loo vaaia le lafoai solo ma o loo agai uma lava i Tafaigata ae o le tele o ia otaota na ta‘ua e i latou nei e tatau ona vavae ese e fai ai faapalaga mo faalelei eleele.
