E manatu le afioga ile Tamaaiga, afioga Tupua Tamasese Efi ua ese foliga ua sau ai faigamalo faakolone (colonization), poo faigamalo e pulea ai ele tasi atunuu le tasi atunuu mai lo latou saolotoga, faatusatusa i faiga faakolone i tausaga ua mavae.
Ole faiga faakolone (colonization) poo le pulea ele isi atunuu ole isi atunuu, pe faaupuina ole puleesea o ou tofi poo fanua e se isi atunuu, sa faamamafa iai le saunoaga ale afioga ia ile Tui Atua ina ua fesiligia ile autu tonu o lana tusi ua faalauiloa nei ole ‘TAUTAI.’
Ta’ua ele afioga ile Tui Atua, “Aua ne’i manatu se isi ua uma faiga faakolone, leai o lea ua ese foliga ua sau ai”.
Ole lapataiga ale Tamaaiga i tagata Samoa, ia mataala ma tatalo ile Atua e tautai lona sa. Na ia faailoa lona faanaunautaiga oloo fia auauna pea e faasoa lona tomai i tagata Samoa semanu o maua lona malosi e faasoa atu ai se poto ma se atamai oloo ia te ia i tupulaga ma tagatanuu o Samoa.
Na ta’ua foi ele Tamaaiga, “Ia manatua e tagata Samoa, e lei maua fua lo tatou saolotoga, sa tali i lima pulufana a papalagi ma feoti o tatou tuaa ile sailiga ole saolotoga”
“E le vālea o tatou mātua na mafua ai ona feoti auā lo tatou faasinomaga. Afai na feoti ou mātua ise mea tāua, e tatau ona e iloa pe aisea na filifili ai e foai o latou ola. Ole itu lea ia ao ona nofo malamalama ai tagata Samoa, e lei maua fua le tatou tutoatasi, sa maligi le toto e totogi ai.”
“Ete ‘ai a oe ile mama a lou tina, ete le ‘ai ile mama ale tina ale isi.” Ole tasi lea o saunoaga ale Tamaaiga “Ete lē tau alu e sue mai taiala a isi atunuu pe samu i talafaasolopito a isi atunuu e fausia ai lo tatou atunuu, oloo iai lava tatou talafaasolopito ma o tatou talaaga e faatonutonu ai ma taialaina ai lo tatou sa.”
Ole tasi lenei o mataupu na ta’ua ele afioga ia Tupua Tamasese oloo talanoina tele i totonu o Iunivesite o mataupu ole (Colonization ma le Decolonization) poo auala i faigamalo e puleesea ai se malo i lalo e avea ma ana kolone.
“O la’u tatalo ia alofa le Atua ia puipui ma ia maua se alofaga o Samoa ma ona tagata mai ile puleesea.” O faiga malo faakolone i tausaga ua mavae, sa tau taua e pulea malosi ai ele tasi atunuu le tasi atunuu, ae o aso nei, ua faaaogāina le faapolokiki e ui mai ai totonu le ulu ole gata e nate faaseseina tagata ile suamalie o atinae ma fesoasoani i faigapaaga a malo.
Na ta’ua foi ele afioga ile Tui Atua “aua ne’i faaseseina se tasi i suiga oloo iai nei, tatou te le o mafuta ma ni agelu e foai fua mai ni mea ae leai se taui.”
“Ole gagana lea ua iai ile lalolagi ile taimi nei, e leai se mea e maua fua, afai e aumai e se isi se mea, o lona uiga o la e iai le mea e manao e taui ai, ae ole tatou matafaioi ole vaai mamao pe faamata e fetaui le tau lea ole a e fesuiaia ai se mea ua aumai ma le manaoga oloo mulimuli mai i tua o fesoasoani.”
“E le mafai ona uma le natura ole tagata ole manao e fuaao ma pulea uma e ia mea uma, a’o le galuega la a outou lea e ona meatotino, ole puipuia lelei o outou tagata ma meatotino mai ia atunuu tetele ma latou faiga faakolone ma ia aua ne’i aafia ai lo tatou saolotoga,” o saunoaga ia ale afioga ile Tui Atua.
Ole toe asiasi ole Tamaaiga ile MAU ma toe lalaga le faavae o Samoa ma lona talaaga e ala ise tusi ua ia tusia ua faaigoaina ole ‘TAUTAI’ ua toe lalaga mai ai ma le agaga o tuaa ole MAU mo Samoa ma ona tagata ia ola saoloto.
Ile faigamalo oloo tulai mai nei le HRPP e pei ona tulai mai ai le afioga ile alii Palemia, Susuga Tuilaepa Lupesoliai Sailele Malielegaoi, ua o latou tatalaina se tasi o pine faamau ole tulafono o fanua faaleaganuu, e ala lea ile faataga ose Sa’o ose aiga ona lisiina atu fanua faaleaganuu e le o faaaogāina i tagata faipisinisi mai atunuu i fafo, i lalo ole malo.
Ise vaai mamao ale afioga ile Tui Atua, na ia ta’ua ai, “E feololo lou faaaunuua i nuu ese nai lo o lou faaaunuua i totonu lava o lou atunuu ma ou laueelele.”
“Ole mea leaga lou nofo i lou tofi ma lou faasinomaga i fanua ae ua faatonutonu mai ele isi lou aumau ai.” “Ua aafia fanua o Samoa ile tulafono ale Palemene ile taimi nei, se tasi o itu tāua ia nofo silafia ele atunuu, ona ole aa mautu lea o lou tofi, o ou fanua. A maluelue loa tulaga o fanua, ona popo’e lea ose taofi ise iuga ole a iai.”
“Ole tulaga muamua ile tulafono faavae o Samoa, na faavae e augatama o lo tatou tofi ‘fanua’ ma faatulafonoina ina ia malupuipui ai, ae a aiaia loa le tulafono, o lona uiga ua iai le avanoa ole a segia ese ai lo tatou tofi, ona e leai se mea e maua fua.”
Atonu ua faafaigata ona toe faamoemoe Samoa i ona talaaga ma lona lotoifale, aua le faatonutonuina o lona sa e tusa ma se finagalo ole Tui Atua, ae i sana tuualalo ma se fautuaga, na ia ta’ua ai, “E tatau ona faasoasoa malie mea uma ma le tofa poto ile vaai mamao i ona aafiaga pe lelei pe leaga, aemaise le puipuia ole tofi i faaiuga uma e fai, ae a leai, e muliga foi malo faakolone lea na o tatou pologa ai muamua, nai lo ole kolone fou lea ua agai mai.”
Ole tatou tofi e mai Saua seia paia Analega. Ole pulea ma le vaaia o a tatou tofi ole tatou lea matafaioi faaletagata soifua.
Lē faatāua ele Palemene se Leo ose Ao ole Malo
Na fesiligia e se tasi o tusitala susuga ia Failautusi Tiatia le Tamaaiga poo le ā sona finagalo ile taimi ao ia saofai mai ile tofi e avea ma Ao ole malo, lea na ia sainia ai le tulafono ile faatagaina lea o tagata faipisinisi atu i atunuu i fafo ona fai a latou atinae ma pisinisi i totonu o Samoa.
Sa tali manino le afioga ile Tamaaiga, “E le faigofie le avea o oe ma Ao ole Malo, ona o lau matafaioi, ole tuualalo ma faufautua ile Palemene.” Ua iai foi taiala e lima taitaiina ai le galuega faa Ao ole Malo. E faatolu ona ave se fautuaga ale Ao ole Malo i totonu ole Palemene ise mataupu, ae lē mafai ona faumalo le Ao ole malo i sona taofi pe a mafuli tasi le Palemene e pasia se mataupu.”
“E feololo pe afai o oe ole Palemia auā o oe e faia le faaiuga, ae ole Ao ole Malo, e na ole tuualalo ma faufautua, ae a iai se mataupu e auese ai sona finagalo, oloo iai auala nate uia e avata ai se fautuaga, ae ole tonu e fai uma mai ele Palemene.”
“Ole mea faigata tele ise Ao ole Malo se mataupu ua pasia ele Palemene, aemaise lava faiga malo faatemokalasi.”
“E faigata tele la ise Ao ole Malo ona faatautee i sona taofi mai le mea ua autasi iai le Palemene, ona e le tatau ona manatu se Ao o se Malo ua sili atu sona taofi nai lo ose isi, ae fai lana faaiuga i luga ole mea e malu ai le Tofi ma le nofo filemu.”
“Ole tasi o mea pito sili ona faigata ole faatolu ona avatu ose taofi ole Ao ole Malo poo se tuualalo ile Palemene ae le taliaina, ose lē faaaloalo poo se lē aloaia ose tuualalo atu ale Ao ole Malo, ole itu faigata tele lea. E faigata ona faatautee atu se lagona ise mataupu ua pasia.”
Ta’ua e Tupua Tamasese “E le tāua ia te au faigamalo ma faakolone, faatemokalasi ma faigamalo oloo tulai mai, ae ole mea tāua ia te au, ia malu Samoa ile alofa ole Atua na ia aumaia le saolotoga ia i tatou.”
E talitonu le Tamaaiga e mau eseese le atunuu, e ese foi o latou lagona mai ia te ia, ae mafua ona mamafa lenei mau ia te ia ole tofi ona o lona tupuaga.
Ile suesuega ale tamaitai tusitala mai Ausetalia ia Patricia O’Brien na ia maua ai faamaumauga oloo lomia ile itulau e 297 ole tusi ale TAUTAI ole soifua o Ta’isi, oloo faaulutalaina e faapea ‘Ua FAAMAGALO ATU IA SAMOA AE LE MAFAI ONA FAAGALO’. Oloo faamatala mai ai ii le tele ole tau sa totogiina e augatama ma lona aiga mo se saolotoga.” Ose taiala ma se mea moni e maua ai le saolotoga, e talitonu le Tamaaiga oloo ua faamaumauina ile tusi ole “TAUTAI.”
