“A alu o‘u faiva e usu ile taeao ile sua ole tai, ole taimi lena e fagota ai le vaga. E alo atu lava le vaa iinei (gatai o Nofoalii) ae faato‘ā maua i gatai ole malaevaalele i Faleolo le ogasami e tofu ai le figota.”
Ole faamatalaga ale alii o Perenise, oloo nofo ai nei ile aiga o lona toalua i Nofoalii, o lana lava ia lea galuega oloo faia nei. Ole usu ile sami e tufi mai tupe o maua mai ai. “Ua masani ai lava ile malama loa ole taeao usu ile sami, e tate fagota o sua ae pe ifo lava o tofu.”
“Ua lē toe atoatoa le lelei ole gataifale e pei ole mea na iai.” A alu se faiva ile taimi nei a tele lava ma lelei, o maua lava le fitu tamai faguvaga.
“Taunuu mai ile fale ma faatau atu i laulau na e tutū mai luma ole auala ile $20 tala ile fagu. A maua mai tupe o lea aso ma lea aso ona faasoasoa lea e tausi ai le matou aiga toatele.
Ole aiga e aofia ai mātua o lona toalua ma lana fanau e toavalu, ma isi tauaiga o lona toalua latou te nonofo faatasi. O tupe foi ia oloo fai ai meaaoga a lana fanau, pei o pili ma isi meafai ale aoga, ma aai ai ile aoga. A laki lava se aso e oo atu lava ile fitu pe valu foi ni tamai fagu.
“E lua ituaiga o vaga e maua, ole vaga e manifi le momoga male vaga e mafiafia.” Peitai ole taimi lenei toeitiiti lava momoga faasolo atoa, e oo lava i mosooi ua fua faasolo atoa lava ile tausaga.”
Ole mosooi lea e fua iai le taimi e selesele ai le tele o figota e aofia ai male tuitui. Pei ona iai ile taimi nei, ua amata foi ona faatosina le fola a ato tuitui i nuu e pei o Toamua, Puipaa, Vailele ma Letogo.
O Moataa le isi nuu sa masani ona faatau ai tuitui i tafāala i tausaga ua tuanai ae ua lē o toe tutusa. Peitai ile motu tele i Savaii, sa na‘o Faasaleleaga lava na masani ona faatau ai foi atotuitui i tafāala. I molimau ole 30 tausaga talu ai, e manatua lava sa faatau ta‘i $2 ise ato, ae ole taimi nei, ua $10 ile ato.
Ia manatua lava le sefuluai
E lē na‘o Pelenise ole aiga e alu e fagota, e iai foi le isi maupaolo o lana foi lena galuega i aso uma ole tofu figota. Pei ona talanoa ai lona toalua le tamaitai o Susana ile toatele ole latou aiga oloo soifua uma lava e faalagolago i tupe e maua mai ile sami.
“Ole matou aiga nei, o lo‘u uso e nofo i luma ii ma lona toalua male isi o‘u uso e nofo i tua ma matou mātua, ma a‘u ma lo‘u to’alua male ma fanau ile la pito.
Ole toalua o Susana e tofuina le sea. “A sau e tasi le fagu pe lua, ma faatau ai lava. E aumai loa tipi mai le sea o felesi ma faatau, $15 ile tamai fagu, maua ai le meaai, se elegi ma se suka o lena aso, ae tuu ese le $5 mole meaai a tamaiti ile aoga, ae manatua lava le sefuluai e aveese, o matou e lolotu i Faleasiu.
“Pau lea ole mea oloo feola ai le matou aiga, ole galulue ile sami. Ole sami lava oloo faaooga ai ai a matou fanau, a manuia faiva ile alofa ole Atua, ona fasoasoa lea o lena tupe, ae faato‘ā ‘ai lava se matou moa ile Aso Sa.
