E masani lava ona pepese ma alalaga tagata Samoa ma tagata Pasefika e faapea e sili lava meaai Pasefika e lelei e le maua ai se tagata ile ma‘i ma e toa lelei ai foi le manava. Ole manulauti lea ua toe taumafai o tatou tagata e toe lalaga ma fafagu i luga i totonu o atunuu i fafo oloo aumau ai, ona e iai le talitonuga o tagata Pasefika e leai ni gasegase e ono maua ai le tagata ae oloo maua ai foi le tagata ile soifua maloloina lelei.

Talu ai ole tele o mau faamai eseese lea ua tutupu mai ma ua vaaia ai foi le vave ona faamuta ai ole soifua ole tagata ua oo lava i tupulaga talavou ua vave maliliu ona o mai eseese, ua a‘e ai se tofa mamao ma se tofa saili ile ofisa ole Council ile itumalo o Whau ina ia toe sailiili pea i auala e ono maua ai e tagata le soifua maloloina e ala i taumafa.

Ole tulai mai la ole faatofalaiga ale Walking Samoans ile itu i Sisifo o Aukilani, ma ua silasila ai foi le ofisa ole Council i lea itumalo ose avanoa lelei lea e ono maua ai se galuega soofaatasi ale Council ma lea faalapotopotoga ina ia faamalosia ai loa i tagata lautele le faatauaina ole toe gaseseina o meaai Pasefika poo meaai ale atunuu lava latou.

Ile lomiga la ale Samoa Times ile vaiaso ua tuanai na faataoto ma faamanino atu ai se galuega soofaatasi lea ale Council ma le Walking Samoans, e pei ona iai lea faamoemoe lea sa faatoa faatinoina ile Aso Toonai ua mavae, aso 6 o Me ile malae poo le paka oloo taulai ma faamautu iai le Walking Samoans i Avondale.

Na amata ile taeao ile Zumba poo le faamalositino lea na vaaia ai le toatele ole mamalu ole atunuu sa lolofi atu ile fia auai i lea faamalositino ma fia matamata foi ile gasesega o taumafa Samoa. Ua le gata i tagata Samoa lava latou ae ua oo foi i isi tagata mai isi atunuu.

E fou i lea taeao i totonu o Avondale ile maimoa ma le matamata a tagata le asuasu ole ogaumu ale tautua Samoa a‘o faatinoina ai le kukaina ole luau tunu, ole kukaina ole suafai, ole gaseseina ole sapasui faapea le faiga ole poi fa‘i. Ae le gata i lea e maofa foi tagata ile gaosiga ole peepee ale Samoa, lea sa matua sii atu ai le matatuai ma valu ai popo, ma faatino le tatauina ole penu ile tauaga, ma maua ai le peepee. Ose tasi lea galuega ua faailoa atu ai i tagata o isi atunuu le gaosiga ole peepee Samoa faatasi ai ma le kukaina o latou taumafa. Na vaevaeina le ausavavali i vaega eseese oloo iai meaai sa kukaina, ona faafesoaai lea o silafia ma le malamalama o tagata i mea oloo manaomia ile gaseseina o meaai taitasi.

Ole tasi lea vaaiga taua sa iai le taeao ole Aso Toonai ole galulue faatasi o tina ma tama ile faatinoina o lea polokalame aemaise ai ole fetufaaina ole lesipi mai tagata taitasi.

Ole mea moni e tele le ‘oa ma le taleni kuka oloo i aao o tagata Samoa, ae ua tauau ina mou atu ma tanumia ona ua malosi le tele ole taumafa mai Saina ua faaosofia ai le fiafia ole tagata e taumafa ma ua fai ose galuega vave na ole oso atu lava ma faatau mai e le toe alu ai se taimi e kuka ai. Ae ua avea lenei polokalame taua ma avanoa e toe lalaga mai ai le taleni ma le meaalofa na tuuina ele Atua ile tagata Samoa na te tapenaina ai meaai mo lona soifua maloloina lelei.

Walking Samoans West faatauaina ole kukaina o meaai Samoa

Walking Samoans West faatauaina ole kukaina o meaai Samoa

Na maea le gaseseina o taumafa ona tatala lea ole avanoa ile paia ma le mamalu ole atunuu, latou te tofoina ai le felesi ma le matagofie o meaai Samoa. Sa faapea foi ona tatala le avanoa i soo se tasi e fia taumafa lea sa vaaia ai le toatele o tagata oloo nonofo solo e leai ni aiga sa maua ai le avanoa e aai ai, ae faapea foi i isi tagata mai isi atunuu.

Ma o lenei polokalame ose taimi muamua lea ua faatinoina ele Walking Samoans ma o lea ua taulamua ai foi lea faalapotopotoga ile faamalosia ole gaseseina o meaai aua le soifua maloloina ole tagata.

E iai le faamoemoe ole komiti ale Walking Samoans ile itu i Sisifo o Aukilani, ole a faaauau pea lenei polokalame soosoo tauau ale Council ma le Walking Samoans aua le tausia ole soifua maloloina o tagata lautele. Ia o faatasi le savali ma le paleni ole taumafa.

Comments

comments