O upu faaiu ia o saafiafiga alofa ole molimau ale tamā, le faafeagaia ia Isaia Lameta ua faaigoaina o Papa, i toe sauniga osi ona afafine o Abigail Amelia Hope Lameta, lea na faataunuuina ile Aso Lulu ole vaiaso na tea nei ile malumalu ole ekalesia ale Word of Life i Henderson Aukilani.
Ise uiga loloto o lea foaitau, E mavae le ola, ae ola pea le alofa, e ola pea Abi i loto ma fatu o ona mātua ma lona aiga seia oo ile aso e toe feiloai ai.
O Abigail (Abi), e na ole 9 ona tausaga, sa faapelepele iai lona aiga, o ona aunties ma uncles, o ona mātua ma le aiga lautele. Sa matuā faatāuaina lona soifua ma alofagia e tagata, e ui ina laititi o ia.
Ole lanu viole ole lanu e sili ona fiafia iai Abi, ole lanu foi lea sa laei ai ona aiga, uo ma ē masani, ole lanu foi ia o teuga uma o lona toe sauniga. Ose faailoga ole alofa ma le saafi ile soifua talavou o lenei teineitiiti ua valaau iai lona Matai oi le lagi.
“Ua faapopo aso ua ae lē tuua aso folau”, ole alagaupu lea na amata ai le saunoaga ale faafeagaiga ia Isaia. Sa ia faamatalaina le uiga olea gagana: “E iai le taimi e mafaufau ai, e iai foi le taimi e faatino ai. E iai le taimi e faatalitali ai ma mataitū le laolao, e iai foi le taimi e sii ai le fua”.
A‘o latou tutū faatasi ma le faletua ia Lisa ma le tina o Abi o Olive, ma isi o la alo, sa vaaia lava le loto mafatia ole fanau, a‘o faamatalaina e Isaia, le talaaaga ole soifuaga osi ona afafine ma usu faatasi ai le latou pese ma vivii, i upu “…Na e tusitusia ou aso, faia lou finagalo, fanaua a‘u mo oe…silisili Oe lou Atua silisili Oe”.
Sa fanau mai Abigail mai lona tina ia Olive Lameta, le alo o Isaia ma Lisa, ile aso 29 Novema 2007, peitai toe 9 lava nai aso, atoa lona 9 tausaga ae valaau e lona matai ile aoauli o le Aso Sa, 20 Novema 2016.
Sa faamatala e Isaia ole tausaga 2013, sa amata ai ona maua Abi ile ma‘i lili (seizure) ma avatu ai ile falemai e fai ona togafitiga, ma faailoa mai ai e fomai ua maua ile ma‘i Primary Diffuse Gliomatosis.
Sa lē iloa le mafuaaga ole gasegase, e leai se isi ma‘i faapea ua maua i totonu o Niu Sila, ma amata ai loa togafitiga chemo mo le 2 tausaga, sosoo ai ma le biopsy, ma le craniotomy e aveese ai le patu e ono senitimita lona tele. E fā vaiaso o fai ana radiation therapy, ma le tele o aso na iai i totonu ole falemai o tamaiti le Starship.
Ose mea pito sili ona tāua na faamatala ise talanoaga puupuu ma Isaia, na ia faamatala o Abi, sa ia maitauina, e iai le meaalofa faapitoa ole faamalologa, auā e tele taimi a‘o iai ile falemai, e alu ai tatalo mo isi tamaiti mama‘i ma fai le tatalo ole faamalologa mo ē mama‘i ile falemai, na molimauina e Isaia na malolo ai nisi o ma‘i.
Sa aoga o ia ile aoga amata ale Olive Shoots Kindy, sosoo ai ma le aoga primary ale Henderson South, ma le Ranui Primary School. “Ose teineititi na ia ola ile malosi ma le faatuatua aemaise le alofa”.
Saunoa le susuga ile faafeagaiga ia Iliafi Esera o lē na taitaiina le sauniga, na ia faapea, “E lē ole umi ole ola e tāua, ae o lau mea na fai, ma le aafiaga o tagata i lou olaga, i tausaga ua tuuina mai ele Atua, e taua. O nisi tagata e tamomoe televavave, o lea ua mae‘a le tamoega a Abi”.
Faamatala e lona Papa o Isaia, a fiafia Abi pe manao ise mea, ona faataamilomilo lea o ana tala e faapea, “I like it”, ona sosoo lea ma le “I love it”. Ae e lē fai mai sa‘o e manao ise mea. Ae e iai ona uiga faatosina faapena, ma lona siuleo e faailoa mai ai ona faanaunautaiga; o uiga nei o Abi ole a manatua ai lava o ia.
O nisi o mea e manatua ai Abi, e fiafia tele e alu ile lotu, e faauo i tagata, ma faatalofa i tagata ile faitotoa ole falesa. Ole isi mea e fiafia iai Abi a‘o iai ile falemai, le Starship, e lē mafai ona lē uia le fale‘aiga o Pinati mo le faatauina ose keke puaa, ole maoi lea a Abi, o uiga e faagalo gata ai le afafine.
“Faafetai tele i la outou tapuaiga. Faafetai i o outou tulivae alofa mo Abi aemaise osi matou aiga. O lona malosi ma lo matou malosi ua afua lea ona o lo outou afusisina na auala mai ai”. Sa faailoa faapitoa ma faafetaia le lagolago malosi ale faifeau sinia ole ekalesia Peace Chapel Samoa, le faafeagaiga ia Samoa ma le faletua ia Alesi Unoi, aemaise o faafeagaiga ma mātua faaleagaga, Iliafi & Fia Esera faapea Tavale & Alison Mataia. I lona tuugamau, ina ua mae‘a upu faalaeiau ale taitai ole sauniga le susuga ile faafeagaiga ia Iliafi, na usu ai loa le pese ole aso fanau a Abi e faamanuia ai lona 9 tausaga e atoa ile aso 29 o Novema, ma faalele ai lea o paluni lanu viole, na tofu tagata uma ma le paluni, e faatofa atu ai ia Abi.
E ui ina faanoanoa, ae sa vaaia le tele ole alofa, loto filemu ma le agaga faatuatua, auā ole Kerisiano e iai le faamoemoe e toe feiloai ile ola e faavavau i tala atu ole oti.
A‘o sa‘afai ma momoo ile soifua talavou o Abi ua aveesea, ae maua foi tala faanoanoa i faasalalauga i luga o le TV ile vaiaso lava e tasi, ise pepe na maua i le paka ile pitonuu o Magele i Aukilani i Saute, ua maliu, ma ua faalauiloa mai e leoleo, oloo latou sailia vave le tina, ua faamautinoa mai foi ina ua faia se taotoga ole pepe, o lona tina ose tamaitai Pasefika. Oloo iai popolega ile soifua maloloina ole tina, e moomia ai le vaai ose fomai. E ui e lē o iloa le mafuaaga poo le talaaga osi nei alualutoto, ae pagā lea, ose vaiaso o faanoanoaga ona o fanauiti, ua vave ona faamuta o latou soifua.
