Sausaunoaga ale Fono Samoa NSW na taualugaina ai le po (Public Officer: Le-Aufaamuliua Asenati Lole Taylor)

Sausaunoaga ale Fono Samoa NSW na taualugaina ai le po (Public Officer: Le-Aufaamuliua Asenati Lole Taylor)

E ui ina faalogoina le faa’amu’amu a nisi o matai ole atunuu oloo faia la laua polokalame ole Uaea Mosooi ile la leitio i Sini, ae lē o fia maumauina ai lava le mafaufau ole Ta’ita’ifono ole Fono Faatonu (Board of Directors) ale Faalapotopotoga Autu a tagata Samoa o New South Wales, le Fono Samoa NSW.

Na fesiligia le afioga ia Tiumalumatua Lilomaiava Su’a, le Ta’ita’ifono ole Fono Samoa NSW, i sona finagalo ile taufaifai ma le ‘amu’amu o ia tamalii e faatatau ile faamoemoe ole Faalapotopotoga lea na faafoeina ile Roma Function Centre ile aso 10 o Mati 2018, ae na ia saunoa ai e faapea, “E lē ma’imauina le taimi ole Fono Samoa e faasagatau ai ile tagata vaivai, ae o galuega ale Fono Samoa, e lē o alu i tua pe nofo foi, ae e galue punouai pea i luma mo le tautuaina o tagata Samoa o New South Wales”.

Ole faamoemoe ole ‘Fono Samoa NSW’, ose taumafataga na faafoeina e sailitupe ai mo fuafuaga faataatia ale Fono auā le tapenaga ole aso faapitoa ua faaigoaina ole ‘SAMOA DAY’.

E ui lava la ina e lei maua le atoaga o tagata na faatauina atu iai pepa o lenei ‘aiga taumafa, ae sa tele lava i latou sa lei auai atu ae sa totogiina atu lava pepa ulufale mo lea ‘aiga taumafa.

Ole faia ai la ma molimauina foi e nisi ole atunuu o ia matai ma o laua uiga, ua lē ose taimi muamua lea ua laua faia ai lea tulaga e taumafai ai lava e faaleagaina se faamoemoe lelei e faia e se isi, aemaise lava ile Fono ale atunuu.

I nisi lava foi o finagalo sa faaalia ai, lo latou manatu e faapea; ua tauau ina lē mālie ma lē logo lelei i la latou faalogo uiga o ia matai, ae ua avea pea ma faatiga taliga.

Ole saunoaga foi ale Ta’ita’ifono, e aua le amanaiaina i finagalo ole Fono ia manatu ma lagona.  Auā afai e tatou te amanaiaina, ona faaseseina ai lea o lagona ma mafaufauga lelei, e tatau ona faasagatasi ile faatinoina o auala e tatau ona tautuaina ai le atunuu.

Ae tuu ai pea, auā e fe’eife’ei lava ona gase ifo lava lea. Ae ia faatāua i loto o tagata uma, ia lē o upu faalele, ae o galuega e leotele atu lea.

Ole Fono Samoa NSW oloo alo atu nei mo le tapenaina ole aso tuupoina e faailogaina ai le Tutotasi o Samoa aemaise lava ile aso na faavaeina lea e le Fono ua faaigoaina nei ole ‘SAMOA DAY’.

O ia aso e faailogaina ile vaiaso ole faailogaina ole Queen’s Birthday ile aso 9 ma le aso 11 o Iuni o lenei foi tausaga.

Comments

comments