Ole faamoemoe ole komiti o faiaoga oloo tapenaina polokalame o tauvaga tautalaga a fanau i tausaga taitasi ile Polyfestival, ia tata’i lagona ma manatu o fanau ile tauvaga tautalaga ae lē ole tauvaga lauga.
A talanoa loa le tamaititi aoga ile amataina o lana tautalaga i upu maotua ale atunuu, o lona uiga ua ia faua le lauga, ae a sasau mai le amataina ole tapenaga ale failauga ile faatalofa i faamasino ma le auvalaaulia ma amata loa le tautalaga ile autu o lona tulai, o lona uiga o lea ua ia usitaia taiala e pei ona tuuina mai ele komiti.
Ma o nei tapenaga uma ma alafua o tauvaga ale fanau, e tuuina atu foi lea ele komiti i faiaoga ma mātua o aoga taitasi, e fai agai iai sauniuniga ale fanau a’o lei oo ile aso ole faamoemoe, faatasi ai ma faamasino lautogia e fai agai iai a latou faaiuga ile tauvaga.
E iai aoga sa tapena lelei a latou tautalaga, e ala lea ile lava saunia ole failauga, ile to’a lelei, ma le maua lelei ole tautalaga, ae iai foi nisi o aoga sa lē lelei tapenaga ona fai mai latou ua puupuu le taimi, na mafua ai ona lē maua lelei le tautalaga ale tamaitiiti, lau ile pepa ma lē uma foi le tautalaga, e mafua mai ona ua galo.
E ui lava la i nei faafitauli laiti, ae na faailo le lagona fiafia ole faletua ia Vini Lale Peteru, ose tasi o faletua ua iva tausaga talu ona avea ma faamasino o lenei tauvaga.
Ole faafiafiaina o lona loto i tauvaga nei ale fanau, o fanau ia na soifua pe sa fananau i Niu Sila, ole taumafai lava lea e tautatala ile gagana Samoa, auā o lona talitonuga e lē faigofie le faaleoina o upu ile sa’o e tatau ona iai, fatuina o manatu, aemaise foi ole feau tāua oloo momoli mai i lenei tauvaga tautalaga, ia aua ne’i saunoa faamatai, ae ia saunoa ole tautalaga.
E telē foi se tulaga lelei mo a’oa’oga oloo aumai i nei tauvaga, auā e mafai ona fatu ele tamaitiiti lana tautalaga i ona mafaufauga, e ala lea ile fai o lana suesuega i mataupu ia ua aumai ele komiti e filifili iai le tamaitiiti, aemaise ole faamalosia ai ole tamaitiiti e talanoa ile gagana Samoa, ole gagana muamua ale tamaititi Samoa.
E lua aso sa faataunuuina ai le tauvaga tautalaga ale fanau, mai aoga eseese i Aukilani ile autu e faapea, “Ia faatāua le saogalemu i luga o auala.” Ole Aso Lulu lea sa amataina ai ile tauvaga ale Vasega 9, e 10 aoga sa tauva, Vasega 10 e 15 aoga sa tauva, ma le Vasega 11 e 14 aoga sa tauva.
Ole Aso Tofi ole tauvaga ile Vasega 12 ma le Vasega 13, ma e lua vaega sa vaevaeina iai, ole vaega muamua o tautalaga na saunia lelei lea sa auai ai le Vasega 12 e 15 aoga sa tauva ai, ma le Vasega 13 e 15 aoga sa tauva ai, ma le vaega lona lua, o Tautalaga Lē Saunia faatoa tapena le tautalaga ile taimi e avatu ai le autu i luma o faamasino lea sa tauva ai na’o le Vasega 13 ile 12 aoga sa tauva ai.
Faamasino ole Tauvaga Tautalaga
Faletua ia Vini Afutoto Lale Peteru Leota
Asiava Atonio Tuipea
Afioga Tofilau Siliva Gaugatao
Susuga ile alii leoleo ia Papaloa Talosaga.
Ole faletua ia Alaimalo Sarah Vaega sa fai ma fofoga o aso nei e lua, ae ole susuga ia Lemoa Henry Sevesi Fesulua’i sa gafa ma le tauina ole taimi faatulagaina o failauga taitasi.
O lenei tauvaga sa lagolagoina lea ele matagaluega o femalagaa’ina i Niu Sila.
Iuga ole Tauvaga Tautalaga
Vasega 9
Christian Petimani – Sir Edmund Hillary Collegiate
Loreal Urika Filifilia – Mangere College
Lautusi Siaosi – Tangaroa College
Vasega 10
Agaiotupu Logouli – Kia Aroha College
Zion Callaghan Faafetai – Kelston High School
Iosefa Leiataua – Southern Cross Campus & Mele Asolelei Fretton – Mangere College
Vasega 11
Logomai Farani – Aorere College
Salati Tiatia – De La Salle College
Blessing Taituave Fuimaono – Mangere College
Vasega 12
David Faalau Solia – Sacred Heart College
Julia Kilipati – Mangere College
Fono Casey Tafa – Tangaroa College
Vasega 13
Jane Malau’ulu – Mangere College
Anton Anitoni – Waitakere College & Sakaria Filo – Avondale College
Faatafa Fosi – James Cook High School & Demelsar Farani – Aorere College
Tauvaga Tautalaga Lē Saunia
Vasega 13
Levi Teleiai – Mangere College
Julieana Leilua – Tangaroa College
Laki Sami – Kelston Boys High School; Pio Ioane – Manurewa High School; Esther Pu’a – Sir Edmund Hillary Collegiate.
