Faafetai i le Atua auā e ui ina timuia ma lāina a o lea ua ‘ainā le liu o le sa o le tautai ona o le sogasogā i mea lelei ma le ola finafinau. E faaeaina foi le ola a‘oa‘oina. O le afiafi o le Aso Lulu, aso 5 Mati na matuai faatumulia ai le Brisbane Convention Centre i le taulaga o Brisbane i aiga, uo ma ē masani ona o le sagisagi fiafia i taumafaiga a alo ma fanau.
E to‘a 250 le aufaauu ae filofilo ai ma Samoa e toaono. O nei Tusipasi Diplomas na amata mai i le 2012-2013, ae tasi a le faauuga a le M.S.I.T (Metropolitan South Institute of TAFE) e faia i le tausaga lea e masani ona fai i le masina o Fepuari poo Mati. E oo mai i le masina o Mati 2014 ua tausaga lua le toatele o isi alii ma tamaitai i le tele o Iuniveste e pei o Grifith, USQ, UQ, ma isi mo le sueina o Tikeri ma le faalauteleina o tulaga tau a‘oa‘oga.
O alo nei e toalima o Samoa na faauu ma o latou faailoga:
1. Elisapeta Uivaa Koki – Diploma of Community Services. O se alo e faasino i le tina ia Faimafili (Faleasiu) ma le tamā ia Talapō Uivaa (Fogatuli & Falealupo).
2. Aoee Zero Laloata – Diploma of Justice. O le alo e faasino i le tamā ia Metotisi Fata (Afega & Sagone) ma le tina ia Marie Laloata (Samauga, Samalaeulu & Aleisa)
3. Puleitū Tumamā Fiu – Diploma of Justice. O le alo o le tamā ia Faleata Fiu (Salelologa) ma le tina ia Safata Fiu (Safotu).
4. Jenny Fafai – Diploma of Justice. O se alo e faasino i le tina ia Ruby Fafai (Lalomalava) ma le tamā ia Vaoga Atina’e Fafai (Tuanai).
5. Rachael sa lei mafai ona maua lona tusi sa faauu ai i lea afiafi aemaise o ni faamatalaga ia te ia.
E toaono i nei alo o Samoa na faauu, le faletua ia Rosa Tamala Fiu, i lona faailoga o le Diploma of Management. Ua moni ai le upu, ‘E faaeaina le ola a‘oa‘oina’ ma e leai se mea e lē mafaia e ala i le faatuatua ma le faamalosi mai o Keriso.
