Ole tupe aofai lea ole tupe Niu Sila ole a maua e Joseph Parker ile la fusuaga ma Anthony Joshua.

O lenei seleni ua uma ona ioe iai pulega e lua faatasi ai ma isi tuutuuga ole fusuaga tele.

Ole vaiaso nei ole a malaga atu ai Segialii David Higgins ole Duco Events le pulega a Parker, e lulu aao ma Eddie Hearn ma saini lima le feagaiga ole a taiala ai le fusuaga a Parker ma Joshua.

Na ta’ua e Segialii o lenei ioega na maua i auala lē ma’alofia. Ole faifai o Parker ma lana pulega ia Joshua ua ala ai ona mautu le manatu ole alii fusu e feiloai ma Parker. Na faatonutonu lelei ai e Duco Events faaupuga e lafo ia Joshua, aemaise ai le faamamafa ole auvae tioata ole alii Peretania.

Na saili e Duco ata video na faaali ai le palasi soo o Joshua i totonu ole maea ona o lona auvae. Na fesiligia foi e Duco ma Parker le lautele tele ole tino o Joshua e pei ose tagata siisii uamea mamafa.

Na fesiligia foi le malosi ole mafaufau o Joshua e feiloai ai ma Parker.

O nei suesuega na faaaogāina ai mea moni e faasino ia Joshua. Ole talitonuga lea a Segialii, fai mai e lē oni mea pepelo upu na faasino ia Joshua ae o mea moni. E moni ua faafia ona pa’ū i totonu ole maea ona ole faaletonu o lona auvae.

Ana lē seanoa ia faiga, ole talitonuga o Segialii e matuā lipi ma se ioega e feiloai ai alii fusu ia ile 2017. O lona uiga ua faaita e Parker ma le Duco Events Anthony Joshua. Na faatonu ai e Joshua lana pulega e saili loa se avanoa e fusu ai ma Parker i totonu ole maea.

Pau le tali a Joshua ole lau lea ole gutu oso o Parker, ma fesiligia ai e Joshua le tagata o Parker ma lona agavaa e faatino ai le fusuaga. Ae o nei metotia a Duco ma Parker na fai lea ma le talitonu mausali e faia’ina Joshua ile fusuaga.

Ae tasi le mea, ole faifai ole auvae o Joshua ua fai lea ma meaalofa a Parker mo Joshua, ua iloa ai e Joshua ole a tuliloaina e Parker lona auvae. Ma ole a nofo tapena ai foi ma le alii fusu i lea tulaga.

E oo foi le lapoa o lona tino ma le masoa. Atonu ole a vaaia ai se tagata tino laititi ile taimi ole fusuaga ole a televave ai le gaoioi ale Peretania i totonu ole maea.

Na ta’ua e Segialii ua ioeina tulaga tāua ole fusuaga. E iai le pasene a Parker e maua. Ua taliaina foi ma le avanoa e toe fusu ai Parker ma Joshua pe a manumalo Parker ile fusuaga.

Ole masina o Aperila ole a fai ai le fusuaga i totonu o Peretania. Ae e iai foi ma le avanoa e toso ai le fusuaga e fai i Sepania. Ile taimi nei, ole nofoaga e faataunuu ai le fusuaga faatasi ai ma nisi vaega laiti o tapenaga e lei mautu lelei ile taimi nei.

Ae ole vaevaega o tupe mo Parker ma Joshua, e tasi vae tolu mo Parker ile lua vae tolu mo Joshua. E onomea lea ile isi tulaga auā e tolu fusi ole a sau ma Joshua WBA, IBO ma le IBF ae e tasi le fusi ole a alu ma Parker.

Ole tagata manumalo i lea po, o ia lea ole a sola ma fusi uma e fā.

Ole faamoemoe e fai le fusuaga ile aso 31 o Mati e le talafeagai lea ma le ESPN le televise ole a faasalalauina le fusuaga.

Comments

comments