O ai lava e sa‘o, sa tatau ona taofia ele SRU Damian McGrath e avea ma faiaoga ale Samoa Sevens. Ua manino lea tulaga ina ua manumalo le ‘au fou a McGrath, Canada Sevens ile HSBC Sevens a Singapore ile faaiuga ole vaiaso ua tea. Ole tulaga fou a Kanata ua iai nei ua tu 7 ile taamilosaga ole 2016/2017.

Ae ole Manu Samoa 7s i lalo ole vaaiga a Sir Gordon Tietjens, oloo mausali i lalo ile tulaga 13. E le uma a‘i aso toe tasi le taamilosaga oloo totoe nei o lenei tausaga. E ao ai lava ona fesiligia le tofa ma le faautaga ile Laulau a Fono ale Iuni Lakapi ale atunuu ile faamalolo  o Damian McGrath ile tulaga ole faiaoga ale Manu Samoa 7s.

O lea ole a uma le tausaga ae e le o iai ma se suiga ole tulaga ole ‘au ale atunuu. E ui ina ua vaaia suiga ole malosi o taaalo a tama ole ‘au, ae e le o iai ma se faamoemoe e ono siitia lona tulaga i luga atu ole 10.

Ua fā ai nei masina o tumau pea le Manu Samoa 7s ile tulaga 13. Na gata mai le iai i luga a‘o faiaoga a Damian McGrath ile tausaga ua mavae, lea na manumalo ai le Manu 7s ile taamilosaga i Pale i Farani.

Ole filifiliga ale SRU e faamalolo ia McGrath na faasino tasi ile lē mafai ona maua ose avanoa o Samoa e tausinio ai ile Olimipeka i Rio. Ole taimi foi lea na tuliese ai e Niu Sila Sir Gordon mai le tulaga faiaoga ile NZ 7s. Tali Samoa, e iai le avanoa iinei. Ona tuliese ai lea o Damian McGrath, ae sainilima le SRU ma Sir Gordon.

Talu ona taunuu McGrath i Kanata na amata ai ona alu alu i luga taumafaiga ale ‘au. Na sami uma ia mea ile manumalo ai o Kanata ia Amerika (USA) ile taaloga faaiu i Singapore.

Na osofaia e Kanata le USA mai le amataga, lea na sosoo ai ana sikoa e tolu ma oo ai ‘ai ole taaloga ile 19-0 a USA.

E matautia lea mea. E ui na toe tali Amerika i sikoa e tolu, ma tutusa ai le taaloga, ae o Kanata na toe maua ai le sikoa mulimuli e faaiu ai le taaloga.

Ae o lea foi sikoa mulimuli a Kanata, na maua lea mai osofaiga a Amerika. Sa tatau lava ile USA ona faauma le taaloga ile latou osofaiga mulimuli. O iina e iloa ai e le ose mea laki lea na fai a Kanata. Ae ose tulaga maualuga ua oo iai le taalo taitoafitu ale ‘au i lalo ole vaaiga a Damian McGrath.

Ae e le na‘o Amerika foi na manumalo ai Kanata. Na ta‘u e Kanata le sese o Niu Sila ile taaloga muamua ole Ipu, Kanata 26-14 a Niu Sila. Sosoo ai ma le faia‘ina o Egelani ia Kanata 17-5 a Egelani. Ae o isi taaloga ile pulu a Kanata na manumalo ai ia Russia 28-15.

E ui na faia‘ina ia Fiti 35 ile 7 a Kanata, ae ose tulaga na vaivai ai le finau a Kanata, e pei ona finau mai ai seia oo ile sailiga siamupini ma manumalo ai.

Ae o Samoa, talofa e, pau le mea ole tapuai pea ma onosai atonu e iai se taimi. Ae e foliga mai e le ole taimi lenei. Pau le manumalo o Samoa o lana manumalo ia Iapani Samoa 26-14 Iapani ile taaloga ole Sipuni. Ae na pau tatou ia Kenya ma Argentina i ‘ai 17-7.

Tumau pea tatou ile tulaga 13, mo le taimi nei. Ae viivii Damian McGrath ma Kanata i ana mea maoae ua fai.

Comments

comments